Կապանում գտնվող սպանդանոցներից մեկի 17 աշխատակից վարակվել է բրուցելոզով: Նրանցից 14-ն այժմ բուժվում են Կապանի բժշկական կենտրոնում, երկուսը դուրս են գրվել, իսկ մեկը բուժվում է Երևանում։ Հիվանդության առաջին դեպքը գրանցվել է դեռևս երկու շաբաթ առաջ: Ըստ «Իրազեկ և պաշտպանված սպառող» հասարակական կազմակերպության նախագահ Բաբկեն Պիպոյանի՝ այդ սպանդանոցի արտադրանքն արտահանվում է Իրան և չի վաճառվում տեղական շուկայում:
Կապանի բժշկական կենտրոնում արդեն երկու շաբաթ է բուժվում է բրուցելոզով վարակված 15 հիվանդ, որոնք աշխատում են տեղի «Գյուղարտ» ՓԲԸ- ին պատկանող սպանդանոցում։ Ըստ կենտրոնի ինֆեկցիոն բաժանմունքի վարիչ Աիդա Բադալյանի՝ նոր դեպքեր չեն արձանագրվել, հիվանդների վիճակն էլ բավարար է։
Կենտրոնում արձանագրված առաջին իսկ դեպքի մասին տեղեկացվել է առողջապահության նախարարությանը, սակայն անհասկանալիորեն թե գյուղատնտեսության, թե առողջապահության նախարարությունները չեն բարձրաձայնում տեղի ունեցածը:
«Իրազեկ և պաշտպանված սպառող» հասարակական կազմակերպության նախագահ Բաբկեն Պիպոյանը առողջապահության նախարարության կողմից մեծ բացթողում է համարում այն, որ սպնադանոցի մյուս աշխատակիցներ մինչ օրս ստուգումներ չեն անցել։
Բաբկեն Պիպոյանն ու իր գործընկերները երկու օր առաջ են վերադարձել Կապանից և իրենց հետ բերել փաստաթղթերի մի փաթեթ, որի ուսումնասիրություններից հետո միայն պարզ կլինի վարակի աղբյուրը: Իրավապաշտպանները եղել են սպանդանոցում և փաստում են, որ անասունների մորթը կատարվել է բացառապես պետության կողմից տրամադրված փաստաթղթերի հիման վրա: Ուսումնասիրությունները ցույց կտան, թե միայն ա՞յդ կենդանիներն են մորթվել, թե՞ այլ կենդանիներ էլ, ասում է Պիպոյանը։
Նա այստեղ նաև գյուղատնտեսության նախարարության թերացումն է տեսնում: Ներդրվել է պատվաստման պիլոտային ծրագիր, ինչն էլ թերի է և ոչ արդյունավետ, քանի որ մենք չունենք համապատասխան լաբորատորիա, որտեղ կպարզեն՝ կենդանին հիվա՞նդ է, թե՞ պատվաստված, ասում է Պիպոյանը։
Սննդի անվտանգության պետական ծառայությունից մեզ հայտնեցին , որ այժմ ուսումնասիրություններ են իրականացվում՝ պարզելու վարակի աղբյուրներն ու պատճառները, քանի որ սպանդանոցը չի աշխատել 2014 թվականի նոյեմբերից։
