Ալիսա Գևորգյան
Հասմիկ Մարտիրոսյան
«Ռադիոլուր»
«Աշխատանքի և սոցալական հարցերի նախարարության մասնագետը երեք տարի շարունակ մոլեռանդորեն փորձում է իր գաղափարները կյանքի կոչել ՝ դրա համար չունենալով որևէ հիմք: Ինչպես երեք տարի առաջ ներկայացված նախագիծը, այնպես էլ այս օրերին շրջանառության մեջ դրվածը, դատապարտված է ձախողման»,- «Ժամանակավոր անաշխատունակության նպաստների մասին» օրենքում առաջարկվող փոփոխություններին այսպես է արձագանքում Հայաստանի գործատուների միության նախագահ Գագիկ Մակարյանը:
«Մենք շարունակ խոսում ենք կանանց ու տղամարդկանց իրավահավասարության մասին: 2009 թվականից հետևողականորեն փորձում ենք կանանց մղել դեպի բիզնես, իսկ հիմա նման օրենքներով նրանց հիասթափեցնում ու կանանց հնարավորությունները սահմանափակում ենք»,-ասում է գործատուների միության նախագահը: Նրա համոզմամբ չաշխատող հղի կանանց խնդիրները պետք է լուծել ոչ թե աշխատող կանանց գումարները կրճատելու, այլ տնտեսության զարգացման հաշվին:
«Ժամանակովոր անաշխատունակության նպաստների մասին» և «Պետական նպաստների մասին» օրենքներում առաջարկվող փոփոխությունների վերաբերյալ իրենց դժգոհություններն ամփոփել և արդեն թղթին շարադրված պահանջի տեսքով համապատասխան մարմիններին ու հանրությանն են ներկայացրել Ժամանակավորապես անաշխատունակ ճանաչված անձանց իրավունքների պաշտպանության քաղաքացիական նախաձեռնության անդամները: Նրանք ևս պնդում են, որ բյուջետային միջոցների ծախսարդյունավետությունն ու հասցեականությունը անթույլատրելի է ապահովել աշխատող և հղիության արձակուրդից օգտվելու նպատակ ունեցող կանանաց իրավունքների ոտնահարման հաշվին:
«Ժամանակովոր անաշխատունակության» և «Պետական նպաստների մասին» օրենքներում առաջարկվող փոփոխությունների շուրջ կրքերը չեն հանդարտվում: Այդ փոփոխություններին կողմ և դեմ տեսակետները բախվում են «Ռադիոլուր»-ի պատրաստած թեմատիկ անդրադարձում:
