Գաղտնի սենյակով Երևանի ամենահին կամրջի «թռիչքները» վերականգնվում են

Հաղթանակ կամրջի ներքևում Հրազդան գետի մի ափը մյուսին կկապի ևս մեկ բազմաթռիչք կառույց։ Պատմական առումով այն բացառիկ է՝ Երևանի պահպանված ամենահին կամուրջն է, որը քարերի գույնի շնորհիվ ստացել է «Կարմիր» անվանումը։

1679թ.-ի Երևանի մեծ երկրաշարժը մեծամասամբ փլուզել էր կառույցը, ինչից հետո դրա վերականգնումը ստանձնել էր 17-րդ դարի մեծահամբավ հայ առևտրական Խոջա Փլավը։ Մեր օրերում «բազմաթռիչք գեղեցկուհին» մեջքը կրկին ուղղում է բարերարի միջոցով, ով առայժմ ցանկանում է անհայտ մնալ։