Եվրոպական խորհրդի նախագահ Շառլ Միշելը դատապարտել է Ամստերդամում Իսրայելի քաղաքացիների վրա հարձակումները:
«Բռնության և ատելության նման գործողությունները պետք է անվերապահորեն մերժվեն ցանկացած հասարակության մեջ։ Հակասեմականության և ատելության ցանկացած դրսևորման դեմ պայքարի մեր հանձնառությունը մնում է անսասան։ ԵՄ-ն շարունակելու է իր նպատակաուղղված ջանքերը՝ խրախուսելու հանդուրժողականությունը, ապահովելու հարգանքը և պաշտպանելու բոլոր մարդկանց անվտանգությունն ու բարեկեցությունը»,- գրել է Միշելը X-ի իր էջում։
I strongly condemn the utterly reprehensible attacks targeting Israeli citizens in Amsterdam. Such acts of violence and hatred must be unequivocally rejected in any society.
— Charles Michel (@CharlesMichel) November 8, 2024
Our commitment to combating antisemitism and every form of hatred remains steadfast.
The EU will…
Ուրբաթ երեկոյան Ամստերդամում հարձակման են ենթարկվել իսրայելական «Մաքաբի» ֆուտբոլային ակումբի երկրպագուները՝ Եվրոպայի լիգայի ընդհանուր փուլի 4-րդ տուրում կայացած «Այաքսի» հետ խաղից հետո։
The Jerusalem Post-ի փոխանցմամբ՝ 10 մարդ վիրավորվել է, ևս 3-ը անհետ կորել են։ Հարձակումներին առնչություն ունենալու կասկածանքով բերման է ենթարկվել 57 մարդ։
Times of Israel-ը հայտնում է, որ հարձակվողները դիմակներ են կրել և պաղեստինամետ կարգախոսներ են բղավել։ Կազմակերպված խմբերը հարձակումներ են իրականացրել քաղաքի տարբեր հատվածներում։
Հարյուրավոր մարդիկ վախեցել են դուրս գալ հյուրանոցի իրենց համարներից՝ օդանավակայան հասնելու համար։ Իսրայելի վարչապետ Բենիամին Նեթանյահուն որոշել է ինքնաթիռներ ուղարկել Ամստերդամ՝ իսրայելցիներին տարհանելու համար։
CNN-ի փոխանցմամբ՝ Նիդեռլանդների վարչապետ Դիկ Շուֆն ասել է, որ կապի մեջ է Նեթանյահուի հետ՝ կապված «իսրայելցիների վրա բացարձակապես անընդունելի հակասեմիտական հարձակումների հետ»։
Ամստերդամի ոստիկանությունը հայտնել է, որ չորեքշաբթի երեկոյան ուժեղացրել է անվտանգության միջոցառումները քաղաքի կենտրոնում՝ բախումների պատճառով։ Միջադեպ է գրանցվել Պաղեստինի դրոշը պոկելու հետ կապված:
Նիդեռլանդների ոստիկանությունը հայտարարել է, որ հանցագործները «ակտիվորեն փնտրել են իսրայելցի կողմնակիցներին՝ նրանց վրա հարձակվելու համար» և հաստատել է 62 մարդու կալանավորումը։ 5 մարդ հոսպիտալացվել է, իսկ 20-30 այլ անձինք թեթև վնասվածքներ են ստացել։
