Լիբանանում պայթյունների համար օգտագործված փեյջերները Թայվանում չեն արտադրվել․ էկոնոմիկայի նախարար
Լիբանանում մահացու հարված հասցրած փեյջերներում օգտագործված դետալները Թայվանում չեն արտադրվել, ուրբաթ ասել է Թայվանի էկոնոմիկայի նախարարը:
Թայվանում հիմնված Gold Apollo ընկերությունն այս շաբաթ հայտարարել է, որ չի արտադրել հարձակման ժամանակ օգտագործված սարքերը:
Դեռևս չի պարզվել, թե ինչպես և երբ է փեյջերներում հեռահար կառավարվող պայթուցիկ տեղադրվել: Նույնը վերաբերում է Հըզբոլլահի կողմից օգտագործվող հարյուրավոր ձեռքի ռադիոկապի միջոցներին, որոնք չորեքշաբթի օրը պայթել են հարձակումների երկրորդ ալիքի ժամանակ: Երկու միջադեպերի արդյունքում Լիբանանում զոհվել է 37 մարդ, վիրավորվել է մոտ 3000-ը:
«Դետալները (հիմնականում) ցածրորակ IC (ինտեգրալ սխեմաներ) և մարտկոցներ են», — լրագրողներին ասել է Թայվանի էկոնոմիկայի նախարար Կուո Ջիհ-Հուեյը:
Երբ նրան հարցրել են, թե արդյոք պայթած փեյջերների մասերը Թայվանի արտադրության են, նա պատասխանել է. «Կարող եմ վստահորեն ասել, որ դրանք Թայվանում չեն արտադրվել», հավելելով, որ գործը հետաքննվում է դատական իշխանությունների կողմից։
Անվտանգության աղբյուրները հայտնել են, որ Իսրայելը պատասխանատու է երեքշաբթի փեյջերներիի պայթյունների համար, սակայն Իսրայելը դեռ չի մեկնաբանել հարձակումները։
Մինչ Թայվանի իշխանությունները ուսումնասիրում են տեխնոլոգիական մատակարարման գլոբալ շղթաների և Լիբանանում հարձակումների ժամանակ օգտագործվող սարքերի միջև հնարավոր կապը, Gold Apollo-ի նախագահ և հիմնադիր Հսու Չինգ-Կուանգը հինգշաբթի ուշ գիշեր հարցաքննվել է դատախազության կողմից:
Թայբեյի Շիլինի շրջանային դատախազության խոսնակը Reuters-ին ասել է, որ որպես վկա հարցաքննել է երկու հոգու և համաձայնություն է ստացել խուզարկություն կատարել Թայվանում գտնվող նրանց ընկերության 4 գրասենյակներում։
«Մենք կձգտենք որքան հնարավոր է շուտ պարզել թայվանական ընկերությունների հնարավոր ներգրավվածությունը՝ ապահովելու համար երկրի և նրա ժողովրդի անվտանգությունը», — ասել է խոսնակը:
Հեզբոլլահը խոստացել է պատասխան հարված հասցնել Իսրայելին, որը չի ստանձնել պայթյունների պատասխանատվությունը: Երկու կողմերը անցած հոկտեմբերին Գազայում բռնկված հակամարտությունից ի վեր պատերազմի մեջ են:
