Ուկրաինայի նախագահ Վլադիմիր Զելենսկին հաստատել է, որ Կիևի զորքերը կռվում են Ռուսաստանի ներսում՝ Ռուսաստանի Կուրսկի շրջան ուկրաինական անսպասելի անդրսահմանային ներխուժումից օրեր անց, ինչը, ըստ CNN-ի՝ մեծ ամոթ է դարձել Կրեմլի համար:
«Ուկրաինան ապացուցում է, որ իրոք գիտի, թե ինչպես վերականգնել արդարությունը և երաշխավորում է հենց այն ճնշումը, որն անհրաժեշտ է՝ ճնշում ագրեսորի վրա»,-ասել է Զելենսկին շաբաթ օրը ժողովրդին ուղղված իր գիշերային ուղերձում՝ շնորհակալություն հայտնելով Ուկրաինայի զինված ուժերի «յուրաքանչյուր ստորաբաժանմանը» «պատերազմն ագրեսորի տարածք» տեղափոխելը հնարավոր դարձնելու համար։
Այս հայտարարությամբ Զելենսկին պաշտոնապես ընդունեց ներխուժումը, ինչը զարմացրել է ինչպես Ռուսաստանին, այնպես էլ Ուկրաինայի դաշնակիցներին:
Մոսկվան փորձում է զսպել հարձակումը: Ռուսաստանի իշխանությունները լայնածավալ հակաահաբեկչական գործողություն են ձեռնարկել Կուրսկում և ևս երկու սահմանամերձ շրջաններում, և տասնյակ հազարավոր մարդիկ տարհանվել են Կուրսկից։
Արդեն վեցերորդ օրն է, Կուրսկի վրա հարձակումը նշանակալի զարգացում է ավելի քան երկու տարի շարունակվող հակամարտության մեջ:
Կուրսկի շրջանի նահանգապետը հորդորել է իշխանություններին կիրակի օրը արագացնել տարհանումը։ Ռուսական ТАСС լրատվական գործակալության փոխանցմամբ՝ շաբաթ օրվա դրությամբ սահմանամերձ շրջաններից ավելի քան 76 հազար մարդ լքել է իրենց տները։
