Կարճամետրաժ ֆիլմերի 7-րդ միջազգային կինոփառատոնն այս տարի Երևանից տեղափոխվել է Տավուշ
Անցկացվել է Երևանի կարճամետրաժ ֆիլմերի 7-րդ միջազգային կինոփառատոնը: Այս տարի կինոարվեստը մայրաքաղաքից տեղափոխվել է Տավուշի մարզ: Երկրորդ տարին անընդմեջ փառատոնի գլխավոր հովանավորը Երևանի քաղաքապետարանն է:
«Կինոփառատոնն այս տարի ստացել էր ավելի քան 700 հայտ 85 երկրից՝ Չինաստանից մինչև Բրազիլիա ու Եվրոպա։ Մրցութային ծրագրում ընդգրկվել է 46 ֆիլմ. 3 անվանակարգում «Միջազգային ծրագիր»՝ խաղարկային կարճամետրաժ ֆիլմեր, «Ազգային ծրագիր»՝ խաղարկային կարճամետրաժ և վավերագրական ֆիլմեր և «Ուսանողական ծրագիր»՝ խաղարկային կարճամետրաժ և վավերագրական ուսանողական ֆիլմեր։
Կինոդիտումներ, ստեղծագործական հանդիպումներ, քննարկումներ ու վարպետության դասեր. 5 օր շարունակ՝ հուլիսի 29-ից օգոստոսի 2-ը, հանդիսատեսը հնարավորություն ուներ դիտելու միջազգային հեղինակավոր կինոփառատոների մրցանակակիր կարճամետրաժ ֆիլմեր:
Կարճամետրաժ ֆիլմերի 7-րդ միջազգային կինոփառատոնը ոչ միայն աջակցում ու խրախուսում է կինոարտադրության զարգացումը, այլև ձևավորում նոր կինոսերունդ»,- նշված է երևանի քաղաքապետարանի տարածած հաղորդագրությունում:
