Ամերիկյան Apple կորպորացիան նախատեսում է առաջիկա երկու-երեք տարում Հնդկաստանում արտադրել տարեկան ավելի քան 50 միլիոն iPhone, գրում է Wall Street Journal-ը՝ հղում անելով աղբյուրներին։
«Apple-ը և նրա մատակարարները ծրագրում են տարեկան ավելի քան 50 միլիոն iPhone արտադրել Հնդկաստանում առաջիկա երկու-երեք տարվա ընթացքում, իսկ դրանից հետո նախատեսվում է արտադրել տասնյակ միլիոնավոր այլ սարքեր», — «Ռիա Նովոստի»-ի փոխանցմամբ՝ գրում է թերթը՝ վկայակոչելով աղբյուրները:
Եթե ծրագրերն իրականանան, ապա Հնդկաստանին բաժին կհասնի iPhone-ի համաշխարհային արտադրության քառորդ մասը, և այդ մասնաբաժինը կավելանա մինչև 2030թ․, նշել են աղբյուրները: Ակնկալվում է, որ Կարնատակա հարավային նահանգում կառուցվող Foxconn գործարանը կսկսի գործել ապրիլին և առաջիկա երկու-երեք տարիների ընթացքում արտադրել տարեկան 20 միլիոն բջջային հեռախոս, հիմնականում՝ iPhone:
Աղբյուրները նշում են, որ Apple-ը նաև ընտրել է Հնդկաստանը որպես հարթակ բյուջետային iPhone-ների արտադրության փուլի համար, որոնք կվաճառվեն 2025 թվականին:
Բացի այդ, ինչպես հաղորդում է Bloomberg-ը, հնդկական Tata Group կոնգլոմերատը նախատեսում է Հնդկաստանի հարավում կառուցել երկրի խոշորագույն iPhone-ների հավաքման գործարաններից մեկը:
Վերջին մի քանի տարիների ընթացքում Apple-ն ակտիվացրել է իր գործունեությունը Հնդկաստանում և դարձել է այդ երկրից բջջային հեռախոսների ամենամեծ արտահանողը:
Թայվանական Foxconn Technology Group ընկերությունը՝ էլեկտրոնիկայի խոշորագույն արտադրողը և iPhone-ներ հավաքողը, սկսել է iPhone 15-ի արտադրությունը հնդկական Թամիլ Նադու նահանգի գործարանում: Հնդկաստանում արտադրվող հեռախոսի երկու տարբերակ կա՝ iPhone 15 և iPhone 15 Plus:
