․ Այսօր տեղի ունեցաւ Երեւանի նորընտիր քաղաքապետ Տիգրան Աւինեանի երդման հանդիսաւոր արարողութիւնը: Տիգրան Աւինեան երդուեցաւ ծառայել Երեւանի բարգաւաճման, գործել` ի բարօրութիւն Երեւանի բնակիչներուն։
․ Իսրայէլի մէջ տուժածներու շրջանին՝ հայեր չկան. դեսպանատունը Հայաստան վերադառնալ ցանկացողներու գրանցում կը կատարէ։
․ Եւրոպայի խորհուրդի Խորհրդարանական վեհաժողովը որդեգրեց «Մարդասիրական իրավիճակը Լեռնային Ղարաբաղի մէջ» բանաձեւը: Այս մասին տեղեկացուց հայկական պատուիրակութեան ղեկավար Ռուբէն Ռուբինեան: Բանաձեւը կը դատապարտէ 19 Սեպտեմբեր 2023ին Արցախի դէմ Ատրպէյճանի ռազմական գործողութիւնները: Վեհաժողովը ճշդեց, որ Արցախի գրեթէ ամբողջ բնակչութիւնը հեռացած է իր հայրենիքէն՝ ֆիզիքական ոչնչացման վտանգին եւ Ատրպէյճանի կառավարութեան երկարամեայ հայատեաց քաղաքականութեան պատճառով: Վեհաժողովը ճշդեց, որ ցեղային զտումներու իրականացման հիմնաւոր կասկածներ կան:
