Հայաստանը երկրորդ անգամ դիմել է Միջազգային դատարան՝ Ադրբեջանի կողմից դեպի Արցախ տանող միակ ճանապարհին Լաչինի միջանցքում անցակետ տեղադրելու կապակցությամբ, կիրակի օրը Հայաստանի Հանրային հեռուստաընկերությանը տված հարցազրույցում ասել է միջազգային իրավական հարցերով ՀՀ ներկայացուցիչ Եղիշե Կիրակոսյանը։
«Հայաստանը պահանջում է որոշման մեջ ներառել նաև անցակետի հետ կապված խնդիրը, որովհետև փետրվարից հետո իրավիճակ է փոխվել, և անցակետի հետ կապված նոր միջոցի անհրաժեշտություն կա։ Ադրբեջանին ժամանակ է տրվել հայկական կողմի միջնորդությանը պատասխանել մինչև մայիսի վերջ, ինչից հետո դատարանը պետք է որոշում կայացնի»,–ասել է Կիրակոսյանը։
Հայաստանի միջազգային իրավական հարցերով ներկայացուցչի գրասենյակը բարձրացրել է նաև այն հարցը, որ Բաքուն ոչ միայն չի ենթարկվում ՄԱԿ-ի դատարանի միջանկյալ որոշումներին, այլև անտեսում է Մարդու իրավունքների եվրոպական դատարանի վճիռները։
Փետրվարին Արդարադատության միջազգային դատարանը որոշել է Ադրբեջանի դեմ միջանկյալ միջոցներ կիրառել՝ համաձայն ռասայական խտրականության բոլոր ձևերի վերացման միջազգային կոնվենցիայի։ Այս որոշմամբ դատարանը ստիպել է Ադրբեջանին ձեռնարկել բոլոր անհրաժեշտ միջոցները՝ Լաչինի միջանցքով երկու ուղղություններով քաղաքացիների, տրանսպորտային միջոցների և ապրանքների անխափան տեղաշարժն ապահովելու համար։
2022–ի դեկտեմբերի 12-ից Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
