Հասմիկ Դիլանյան
«Ռադիոլուր»
Վերջին տարիներին Հայաստանի գործազուրկների շարքերը համալրել են նաև Սիրիայից Հայաստան տեղափոխված մեր հայրենակիցները: Նրանց հիմական մասի համար դժվար է Հայաստանում աշխատանք գտնել: Սիրիահայերը հիմնականում հմտացած են տարբեր բիզնեսների մեջ, ունեցել են համեմատաբար բարձր եկամուտներ, այժմ, սակայն, Հայաստանում միշտ չէ, որ կարողանում են համապատասխան աշխատանք փնտրել։
http://www.armradio.am/hy/wp-content/uploads/2014/01/270114siriahay.mp3
Հաշվապահ,. մանկավարժ, վաճառող, վարորդ, բուժքույր, տնտեսագետ. Երևանում հիմնականում այս մասնագիտությունների տեր մարդիկ են աշխատանք փնտրում: Վերջին տարիներին մայրաքաղաքում, և ոչ միայն, գործազուրկների շարքերը համալրեցին նաև սիրիահայերը: 29-ամյա Սարգիսը մասնագիտությամբ տնտեսագետ է, արդեն ութ ամիս է Հայաստանում է, ութ ամիս էլ աշխատանք է փնտրում:
Սիրիայում հինգ տարի աշխատել է բանկային համակարգում, Երևանում էլ է ցանկանում աշխատանք գտնել, գործող 22 բանկից 20-ին դիմել է. արձագանքել են երկուսը միայն: Մերժումների պատճառներից մեկն էլ հայերենի ոչ լավ իմացությունն է։
Ընդհանուր առմամբ՝ դժվար է սիրիահայերի համար Հայաստանում աշխատանք գտնելը։ Հիմնականում հմտացած են տարբեր բիզնեսների մեջ։ ՄԱԿ- ի Փախստականների հարցով գերագույն հանձնակատարի գրասենյակի հայաստանյան ներկայացուցիչ Նվեր Սարգսյանը նշում է, որ այստեղ նրանց առաջարկվող աշխատավարձն է ցածր, «իսկ նրանց մեծ մասը չունի այստեղ սեփական բնակարան, վարձով է բնակվում, աշխատավարձը չի բավարարում տան վարձի վճարման համար»։
Սիրիահայերի մի մասն էլ փորձում է Հայաստանում ոչ թե աշխատանք փնտրել, այլ սեփական գործը սկսել, ինչպես օրինակ զրուցակցս ՝Հրայր Ագիլյանը: Նա Հալելպից է տեղափոխվել, փայտագործ է, մի քանի ամիս է, ինչ աշխատում է, արդյունքներից գոհ չէ։
Շուրջ վեց ամիս առաջ Սիրիայից Հայաստան է եկել նաև մյուս զրուցակիցս՝ Հարություն Կվասյանը: Նա հայրենիքում զբաղվում է նրանով, ինչով եւ Սիրիայում՝ ավտոմեքենաների վերանորոգման կետ ունի: Գործիքների մեծ մասն իր հետ է բերել , մյուսն մասն էլ գնել է պետության հատկացրած վարկային միջոցներից, տեղյակ է նաև հարկային օրենսդրությունից, ասում է, որ Հայաստանում իրեն ոչինչ չի անհանգստացնում։
Սիրիահայերը Հայաստան են տեղափոխվել հարկադրված՝ սեփական մահն աչքի առաջ ունենալով: Մինչդեռ՝ ինչպես վերջերս պարզվեց՝ այստեղ նրանց այքան էլ լավ չենք ընդունում: Բոլորովին վերջերս «Մանանդ» տաքսի ծառայության սեփականատիրոջ որդին ընկերների հետ դաժան ծեծի էր ենթարկել Սիրիայից Հայաստան տեղափոխված Բրուտյանների ընտանիքի անդամներից երեքին։
