Հանրաճանաչ երաժիշտ մարտին Յորգանցը Հայաստանում էր, սակայն սահմանամերձ գյուղեր, մասնավորապես Նոր Մասրիկ, որի դպրոցներից մեկի վերանորագման աշխատանքներն է ֆինանսավորել, նրան չհաջողվեց այցելել։
Ասում է, որ մի քանի տարի առաջ Նոր Մասրիկ գյուղից ստացել է հաղորդագրություն, որտեղ իրեն խնդրել են ֆինանսավորել տեղի դպրոցներից մեկը:
«Ես հարուստ մեկը չեմ, չունեմ շատ կարողություններ, սակայն իմ ծանոթների և ընկերների շնորհիվ համապատասխան գումար հավաքվեց և ուղղվեց դպրոցի վերանորոգմանը: Ինձ հրավիրել էին դպրոցի աշխատանքները տեսնելու համար: Վստահ եմ, որ շատ հետաքրքիր միջոցառում էին պատրաստել, բայց հենց այցիս նախորդ օրը սկսվեցին կրակոցները և մեր հանդիպումը չկայացավ»,- ասում է երաժիշտը:
Մարտին Յորգանցը չեղարկել է նաև Երևանում կայանալիք համերգը: «Մենք հայտնվել ենք դժվար և անելանելի իրավիճակում: Շատերն ասում են, որ պետք է պայքարել, ես, որ շատ չեմ աղոթում , եկեղեցի հաճախ չեմ այցելում, բայց համոզված եմ, որ այսօր մեզ միայն աղոթքը կփրկի: Աղոթք ու համախմբում: Մեր միակ օգնականներն են այս իրավիճակում»,- նշում է:
Բայց Երևանում Յորգանցին հաջողվեց նոր երգ ձայնագրել։ Այն հայրենիքի մասին է: Շուտով կներկայացվի հանրությանը։
Սերունդների տարբերություններ ու առանձնահատկություններ, 1988-ից մինչև մեր օրերը. Պոլսից մինչև Փարիզ. Մարտին Յորգանցի վերհիշումներն ու ապրումները հարցազրույցում:
