Ձայների հաշվարկի ժամանակ սխալներ չեն եղել, հայտարարել են «Եվրատեսիլ 2013» երգի մրցույթի կազմակերպիչները։ Նրանք նշել են, որ մտադիր չեն կատարել ձայների վերահաշվարկ, քանի որ համոզված են՝ դրա կարիքը չկա:
Ավելի վաղ Բաքուն հայտարարել էր, որ Ադրբեջանից Ռուսաստանի մասնակից Դինա Գարիպովային ուղղվել է առնվազն 10 բալ, մինչդեռ պաշտոնապես հայտարարվեց, որ այս երկիրը Ռուսաստանը ներկայացնող երգչուհուն ոչ մի միավոր չի տվել:
Հարցը քննարկման առարկա դարձավ նաև դիվանագիտական մակարդակով։ Երեկ Ռուսաստանի և Ադրբեջանի արտգործնախարարները Մոսկվայում կայացած բանակցությունների ժամանակ Ղարաբաղյան հակամարտությունից ու երկկողմ հարաբերություններից բացի քննարկել են նաև Եվրատեսիլի ժամանակ ադրբեջանական ձայների գողության հարցը:
«Եվրատեսիլի» կազմակերպիչ Հեռարձակողների եվրոպական միության հայտարարությունում նշվում է, որ մրցույթի ապաքաղաքական ոգին դրա անցկացման անկյունաքարն է և իրենք կանեն ամեն ինչ՝ այն պահպանելու համար։
