Կորոնավիրուսի տնտեսական հետևանքների չեզոքացման երկրորդ ծրագիրն ունի գյուղատնտեսական ուղղվածություն։ Առաջարկվող փաթեթների մեծ մասը նախկինում գործող ծրագրերն են՝ առավել մատչելի պայմաններով՝ 0 տոկոս տոոկսադրույքով, ինչպես նաև պետության 30-ից մինչև 70 տոկոս համաֆինանսավորմամբ։
Ծրագրի հաստատումից հետո գյուղանտեսական աջակցության բոլոր ծրագրերի շահառուների թիվը մի քանի անգամ ավելացել է։ Երկրորդ միջոցառման շրջանակում շահառու ֆիզիկական անձանց կամ կազմակերպությունների թիվը գերազանցում է 6 հազարը, որոնցից 5 500-ն այն անհատներն են կամ կազմակերպությունները, որոնք դիմել են մինչև 1 մլն դրամ վարկավորման աջակցության գործիքից օգտվելու համար: Կառավարության առաջարկած գործիքներից հատկապես ակտիվ օգտվում են ինտենսիվ այգեգործությամբ, կաթիլային ոռոգմամբ զբաղվող ընկերությունները։ Մեծ է նաև պտուղ–բանջարեղեն մթերող կազմակերպությունների հետաքրքրությունը։
Կանադայից՝ Հայաստան․ «Ռադիոլուրի» զրուցակիցը 2015թ օգոստոսին է Տորոնտոյից հայրենիք վերադարձել։ Կարեն Մկրտչյանը Հայաստանում մասնավոր ու պետական համակարգում աշխատելուց հետո որոշել է սեփական բիզնեսով զբաղվել։ Հիմնադրամ է ստեղծել, որը գործունեություն է ծավալում տարբեր ոլորտներում, նաև՝ գյուղոլորտում։ «Ծիրանուտ» ընկերության տնօրենը կորոնավիրուսի տնտեսական հետևանքների չեզոքացման երկրորդ ծրագրի շահառու է, անհրաժեշտ գյուղտեխնիկան ձեռք է բերել լիզինգի ծրագրով՝ Հայաստանի զարգացման և ներդրումների կորպորացիայից․ կվճարի միայն մայր գումարը, վարկի տոկոսները կմարի պետությունը։
«Մենք կարողացանք տրակտոր, սրսկիչ և խոտաղաց ձեռք բերել։ Ճիշտ ժամանակն էր դրանք ձեռք բերելու։ Բավականին մեծ այգի ունենք, սա մեծ աջակցություն էր, որ չկորցնենք ժամանակն ու սեզոնը»,- ասնում է Մկրտչյանը։
Զրուցակիցս նշում է՝ գումարը արագ է փոխանցվել, վարկը տրամադրվել է ճիշտ ժամանակին։ «Վարկը վերցրել ենք 6 տարի մարման ժամկետով, զրո տոկոսով։ 20 տոկոս կանխավճար ենք մուծել»։
Հայաստանի զարգացման և ներդրումների կորպորացիայի ֆինանսավարկային վարչության պետ Հայկ Հովհաննիսյանն ընդգծում է՝ գյուղատնտեսական տեխնիկայի ֆինանսական վարձակալության ծրագիրը բավական ակտիվ գործում է։ Դրա միջոցով գյուղացիները կարողանում են առանց տոկոսի վարկերով տեխնիկա ձեռք բերել ։ Հիմնադրամն էլ տեխնիկան ապահովագրում է վնասվածքի ու կորստի ռիսկերից։
«Հաշվի առնելով սեզոնայնությունը՝ շահառուներին հնարավորություն ենք տվել վեց ամիս արտոնյալ ժամանակ ունենալ վճարումների մասով։ Ծրագիրը բավականին ակտիվ է։ Հայտերի քանակը 3-4 անգամ ավելացել է կառավարության որոշումից հետո»,- ասում է Հայկ Հովհաննիսյանը։
Կառավարության առաջարկած գործիքներից հատկապես ակտիվ են օգտվում ինտենսիվ այգեգործությամբ, կաթիլային ոռոգմամբ զբաղվող ընկերությունները։ Մեծ է նաև պտուղ–բանջարեղեն մթերող կազմակերպությունների հետաքրքրությունը ՝ ասում է Հայկ Հովհաննիսյանը․
«Գյուղատնտեսության ոլորտին նաև 3-15 մլն դրամ վարկեր ենք տրամադրում՝ մինչև 5 տարի մարման ժամկետով, մեկ տարի արտոնյալ ժամանակով։ Այս վարկատեսակների տոկոսադրույքները նույնպես պետությունն է սուբսիդավորում։ Ոլորտը բազմազան է, կարևոր է, որ գումարներն ուղղվեն գյուղատնտեսության ոլորտի զարգացմանը»,- նշում է Հովհաննիսյանը։
Նա մանրամասնում է՝ պայմանագրերը կնքելիս տոկոսադրույքը սահմանվում է, միաժամանակ նշում է, որ այն սուբսիդավորելու է պետությունը։
Էկոնոմիկայի փոխնախարար Արման Խոջոյանն ընդգծում է՝ գյուղատնտեսության ոլորտում կարևորում են ոչ միայն բերքի առաջնային արտադրությունը, այլ նաև վերամշակումը։ Հենց այդ նկատառումով լիզինգի ծրագրում լրացումներ են կատարվել։
«Ծրագիրն ընդգրկում է նաև սառնարանային, ջերմոցային տնտեսությունները, գյուղատնտեսական նշանակության պահեստային տարածքները, մոդուլային սպանդանոցները։ Բոլորին ներառել ենք, որ օգտվեն ու զարգացնեն իրենց հետբերքահավաքային կարողությունները»,- ընդգծում է Արման Խոջոյանը։
Կորոնավիրուսի համավարակից հետո կառավարությունը որոշեց գյուղատնտեսական աջակցության գործող բոլոր ծրագրերի տոկոսադրույքները սուբիսդավորել։ Ստացվում է, որ գյուղացին բանկից պարզապես պարտք է վերցնում։ Բացի գործող ծրագրերից՝ ֆիզիկական անձանց երկու այլ նոր գործիք էլ է առաջարկվում՝ մինչև 1 մլն դրամ միկրովարկեր և 3-ից 15 մլն դրամ վարկեր՝ խոզաբուծությամբ ու թռչնաբուծությամբ զբաղվելու համար։ Վերջինի դեպքում ոչ միայն վարկի տոկոսադրույքն է զրոյական , այլ նաև պետության կողմից համաֆինանսավորվում է մայր գումարի 30 տոկոսը։
