Ուսանողները ուսումնառության ընթացքում մայր գումար չեն վճարելու եւ կվճարեն միայն տոկոսագումարները, իսկ 80 եւ ավելի միջին որակավորման գնահատական ունեցողները վճարումներ կսկսեն անել միայն, երբ կավարտեն ու աշխատանք կունենան: Այսօր հաստատվել է կորոնավիրուսի տնտեսական հետեւանքները վերացնելուն ուղղված կառավարության 14-րդ ծրագիրը: Ուսանողությանը հասցեագրված միջոցառումների ծրագիրը գործելու է մայիսի 1-ից մինչեւ դեկտեմբերի 31-ը: Այդ ընթացքում աջակցության միջոցառումներ են նախատեսված երեք խմբերի ուսանողների համար՝ կախված իրենց ցուցաբերած առաջադիմությունից:
Ընդհանուր առմամբ, 80 եւ ավելի տոկոս միջին որակավորման գնահատական ունեցող ուսանողների համար զրոյացվում են գործող եւ նոր վարկերի տոկոսադրույքները, մյուսների համար դրանք լինելու են 4 տոկոս: Առավել հեշտացվել է նոր ուսանողական վարկ ստանալու ընթացակարգը եւ նոր ուսանողական վարկերն էլ կտրվեն նույն համամասնությամբ:
Այսպիսով, այն քաղաքական հանձնառությունը, որ բարձր առաջադիմություն ունեցող որեւէ ուսանող ուսման վարձը չվճարելու համար չի հեռացվի բուհից, 100 տոկոսով կատարվում է՝ արձանագրել է վարչապետ Նիկոլ Փաշինյանը:
Կորոնավիրուսի հետեւանքով տնտեսական ճգնաժամի ազդեցությունը, բնականաբար, չի շրջանցել նաեւ ուսանող ունեցող ընտանիքներին:
«Կարծում եմ, միանշանակ կա ուսանողական վարկերից օգտվելու անհրաժեշտությունը, քանի որ կորոնավիրուսի հետեւանքով ճգնաժամային իրավիճակը գրեթե բոլոր ընտանիքներում է: Ուսանողներն էլ այսօր, կարելի է ասել, առաջին խոցելի խմբում են գտնվում՝ վարձավճարների հետ կապված»,- մեզ հետ զրույցում ասաց ուսանող ունեցող ընտանիքի անդամներից մեկը։
Կառավարության ընդունած 14-րդ ծրագրով, որն աջակցություն է ենթադրում բուհական եւ հետբուհական կրթություն իրականացնողներին եւ բուհերում սովորող ուսանողներին, հնարավոր շահառուները բաժանված են երեք խմբերի:
Թե ովքեր կարող են օգտվել կորոնավիրուսի առաջացրած դժվարություններով պայմանավորված ծրագրից՝ ԿԳՄՍ նախարար Արայիկ Հարությունյանն այսօր մանրամասնեց: Նախ՝ որոշումը տարածվում է ՀՀ քաղաքացի ուսանողների վրա, որոնք սովորում են որոշմանը կից ցուցակում ընդգրկված բուհերի առկա ուսուցման վճարովի համակարգում՝ բակալավրիատի, մագիստրատուրայի եւ կլինիկական օրդինատուրայի ավարտական կուրսերում:
«Որոնց հանրագումարային միջին որակական գնահատականը՝ ՄՈԳ-ը, ուսումառության սկզբից մինչեւ 2019-20 թթ.-ի ուսումնական տարվա առաջին կիսամյակի ավարտը կազմում է ՄՈԳ-ի առավելագույն արժեքի 90 տոկոսը»,- նշեց ԿԳՄՍ նախարարը:
Երկրորդ խմբում բացառությամբ ավարտական կուրսերի ուսանողներից, բոլոր կուրսերի ուսանողներն են, որոնց ՄՈԳ-ը նույն ժամանակահատվածի համար կազմում է 90 եւ ավելի տոկոս: Նրանց տրվում է ուսումնական վարձի 70 տոկոսի չափով փոխհատուցում:
«Ընդ որում, այս խմբի այն սովորողները, որոնք ՀՀ օրենսդրությամբ սահմանված կարգով 19-20 ուստարում ստացել են պետության կողմից ուսման վարձի փոխհատուցում, սույն միջոցառման շրջանակներում փոխհատուցումը տրամադրվում է կիսամյակի ուսման վարձի մնացորդային գումարի 100 տոկոսի չափով: Եվ երկրորդը՝ եթե մասնակի կամ ամբողջությամբ վճարել են 19-20 թթ ուսումնական տարվա երկրորդ կիսամյակի ուսման վարձը, այդ չափով կատարված վճարումը համարվում է հաջորդ կիսամյակի ուսման վարձի դիմաց կատարված վճարում»,- նշեց Արայիկ Հարությունյանը:
Երրորդ խմբի մասին.
«Երրոդ խմբում պետական եւ պետական հավատարմագրում ունեցող բուհերի բակալավրիատի, մագիստրատուրայի և կլինիկական օրդինատուրայի առկա եւ հեռակա ուսուցմամբ վճարովի համակարգում սովորող ՀՀ քաղաքացի հանդիսացող ուսանողներն են՝ ուսանողական վարկերի մասով»,- հավելեց նախարարը:
Այս դեպքում ավարտական կուրսերի ուսանողների համար 19-20 ուստարվա երկրորդ կիսամյակի ուսման վարձն ամբողջությամբ փոխհատուցվում է: Եթե օրենսդրությամբ սահմանված կարգով որեւէ ուսանող արդեն ստացել է 19-20 թթ համար ուսման վարձի պետական փոխհատուցում, ապա նրանց կտրամադրվի կիսամյակի ուսման վարձի մնացորդային գումարի չափով փոխհատուցում: Մյուս դեպքերում երկրորդ կիսամյակի վարձը մասնակի կամ ամբողջությամբ վճարած լինելու դեպքում՝ գումարը վերադարձվում է ուսանողին:
Այստեղ մի քանի որոշակի կետերով կարգավորումներ նույնպես կան: Սահմանվել են նաեւ նոր ուսանողական վարկերի արտոնություններ: 80 եւ ավելի միջին որակավորման գնահատական ունեցող ուսանողների համար՝ 0 տոկոս, իսկ 80-ից ցածրի դեպքում՝ 4 տոկոս կկազմի ուսանողական վարկի տոկոսադրույքը: Նույն համամասնությամբ փոխվելու են նաեւ արդեն եղած ուսանողական վարկերը: Այս դեպքում պետությունն է սուբսիդավորելու՝ մայիսի 1-ից մինչեւ դեկտեմբերի 31-ն ընկած ժամանակահատվածի համար:
Վարչապետ Փաշինյանն էլ իր հերթին հստակեցրեց. «Իսկ հեռակայինն էլ՝ վարկերը, ըստ ՄՈԳ-ի, արդեն 80-ից բարձրը՝ 0 տոկոս, 80-ից ցածրը՝ արդեն որոշակի տոկոսներով: Մենք պայմանավորվեցինք նաև, որ ուսանողական վարկերի տրամադրման կարգերը կհեշտացվեն»:
Այս պահին կա 11150 գործող վարկ՝ տեղեկացրեց ԿԲ նախագահ Արթուր Ջավադյանը՝ հավաստիացնելով, որ ուսանողական վարկերի գործընթացը բավականին հեշտացվել է՝ հասանելի դառնալով բոլոր ուսանողների համար: Օրինակ, այլեւս չեն պահանջվելու նոտարով հաստատված երաշխավորություններ: ԿԲ նախագահը բացառեց, որ որեւ ուսանող դիմի ուսանողական վարկի համար ու մերժում ստանա:
Իմ զրուցակից ուսանողուհին, մինչդեռ, կարծիք հայտնեց, որ առավել խոցելի խմբի ուսանողները կրկին դուրս են մնում աջակցությունից: Իր օրինակով էլ հիմնավորեց՝ հեռակա սովորում է ԵՊՀ-ում, երրորդ բարձրագույն կրթությունն է ստանում, երկու անչափահաս երեխա ունի, բայց, միեւնույնն է, որեւէ կերպ աջակցության ծրագրում չի տեղավորվում:
«Ծանոթացա այսօրվա որոշման հետ: Փաստորեն, այն ուսանողները, ովքեր կարող են օգտվել այնտեղ նշված պայմաններից, կարելի է ասել, արդեն իսկ օգտվում էին: Այսինքն, այն, ինչը որ խոցելի խմբի վրա կարող էր տարածվել, էլի դուրս է մնում այս ծրագրերից: Միայն վարկերի միջոցով պետք է կարողանա էլի հոգալ իր ծախսերը: Ցանկալի էր, որ եւս փոխհատուցվեր, ոչ թե մի քանի տոկոս կամ ավել« կամ պակաս վարկ տրամադրեին»:
Ստացվում է այնպես, որ պետությունը պարտքով գումար է տալիս եւ խնդիր է, թե ինչպե՞ս պետք է վաղը ուսանողը վերադարձնի այդ պարտքը պետությանը, երբ գալու է արդեն հաջորդ կիսամյակը՝ հռետորական հարցադրմամբ եզրափակեց նա:
