Նվարդ Դավթյան
«Ռադիոլուր»
Երևանի հակակոռուպցիոն կենտրոնը Երևանի ավագանու ընտրություններին ընդառաջ այսօր կլոր-սեղան քննարկում է կազմակերպել՝ ընտրություններին մասնակցող քաղաքական ուժերի ներկայացուցիչների մասնակցությամբ: Քննարկմանը չեն մասնակցել միայն Հանրապետական և Դաշնակցություն կուսակցությունների ներկայացուցիչները:
Կոռուպցիայի դեմ պայքարի լավագույն միջոցը հակակշիռների ստեղծումն է, կարծում է «Բարգավաճ Հայաստան» կուսակցության լրատվության և հասարակայնության հետ կապերի պատասխանատու, պատգամավոր Տիգրան Ուրիխանյանը: Ցավոք, ասում է, հանրությունն այսօր չի հանդիսանում այն վերահսկող մեխանիզմը, որը կարող է պարտադրել պետական կառավարիչներին չգողանալ, կոռուպցիայի մեջ չթաթախվել:
Ազնվությունը դեռևս քիչ է, պետք են մեխանիզմներ, որոնք անկախ են մարդու հատկանիշներից, ասում է ՀԱԿ ներկայացուցիչ Արթուր Մինասյանը:
Կոռուպցիայի դեմ պայքարի կոնկրետ ճանապարհներ է առաջարկում նաև «Բարև Երևան» դաշինքը: Բայց ինչպես վերջինը ներկայացնող Ռշտուն Մարտիրոսյանն է նկատում, «Երևանի մասին» օրենքի լիարժեք կիրառումն էլ բավարար կլիներ կոռուպցիան նվազագույնի հասցնելու համար, քանի որ օրենքը ավագանու յուրաքանչյուր անդամի վերահսկողական ֆունկցիաներ է վերապահում:
«Օրինաց երկիր» կուսակցության հաղթելու դեպքում քաղաքապետը հանդես կգա եռամսյակային հաշվետվությամբ, ուղիղ եթերում երևանցիների հետ հանդիպումների ընթացքում ներկայացնելու է կատարված աշխատանքի հաշվետվությունը` ծախսերի մասով:
Նույնը անելու են նաև վարչական շրջանների ղեկավարները, ասում է ՕԵԿ ցուցակի 4-րդ հորիզոնական զբաղեցնող Հովհաննես Հովհաննիսյանը:
«Առաքելություն» կուսակցության քաղխորհրդի անդամ Դավիթ Մուրադյանը կարծում է, որ առանց նոր առաջարկների էլ գործող օրենքները բավարար են` կոռուպցիայի դեմ պայքարելու համար: Բայց, ասում է, իրենք էլ առաջարկներ կներկայացնեն։
