«Ժառանգություն» կուսակցության առաջնորդ Րաֆֆի Հովհաննիսյանի համակիրներին այսօր չհաջողվեց Ծիծեռնակաբերդ բարձրանալ Բաղրամյան պողոտայով, ինչը նախատեսել էին անել։ Պողոտայի սկզբնամասում ոստիկանները նրանց թույլ չեն տվել մտնել Բաղրամյան։ Այժմ պողոտան փակ է:
Ժառանգության երթի մասնակիցները Բաղրամյան-Մոսկովյան խաչմերուկում են խմբված, մի մասն էլ շարժվել է Սարյան փողոցով` դեպի Ծիծեռնակաբերդ:
Բաղրամյան պողոտայում տեղի ունեցածի մասին հաղորդագրություն է տարածել ոստիկանությունը։
«ՀՀ ոստիկանությունը Բաղրամյան պողոտայում մի քանի անգամ դիմեց լիազոր մարմնի որոշումը խախտելով երթի կազմակերպման փորձ անողներին, զգուշացնելով, որ երթը այլևս չի կարող համարվել խաղաղ` դրանից բխող բոլոր իրավական հետևանքներով:
ՀՀ ոստիկանությունը պահանջեց սթափվել և թույլ չտալ բախումներ, որոնք անխուսափելի են լինելու հակաիրավական վարքագծի շարունակման պարագայում:
ՀՀ ոստիկանությունը հայտարարեց, որ առանց որևէ հապաղման կիրառելու է օրենքներով ոստիկանությանը վերապահված բոլոր հնարավորությունները` հակաիրավական գործողությունները կանխելու համար, և իր լիազորությունների շրջանակներում պատասխանատվության է ենթարկելու հավաքներին վերաբերող օրենքի պահանջները և հասարակական կարգն ու անվտանգությունը խախտած բոլոր անձանց:
Ոստիկանության կողմից երթի մասնակիցներին տրամադրվեց ողջամիտ ժամկետ՝ Բաղրամյան պողոտան ազատելու համար, սակայն ոստիկանության կոչերն ու հորդորները մնացին անպատասխան:
Ընդգծված հակաիրավական վարքագիծ դրսևորած մի քանի մասնակիցների ոստիկանությունը հեռացրել է նշված տարածքից, և նրանք կենթարկվեն վարչական պատասխատվության»,- ասված է ոստիկանության տարածած հաղորդագրության մեջ։
