Սաթիկ Իսահակյան
«Ռադիոլուր»
Արմավիրի մարզի դպրոցների մեծ մասը վերանորոգման կարիք ունի: Մարզերի առաջնահերթ լուծում պահանջող հիմնախնդիրների լուծման նպատակով Արմավիրի մարզին 2013 թ պետական բյուջեից հատկացվել է ավելի քան 1 մլրդ 261 մլն 448 հազ. դրամ: Միջոցների մեծ մասն ուղղվելու է մարզի դպրոցների վերանորոգման, գազիֆիկացման, լոկալ ջեռուցման համակարգի կառուցման համար:
Գյուղական դպրոցներում դեռ պահպանվել է ջեռուցման ավանդական եղանակը։ Թիթեղյա վառարաններ, հեղուկ դիզելային վառելանյութ, քամու ժամանակ ծուխ, իսկ ընդհանրապես` վառելանյութի տհաճ հոտ, որը հաճախ դառնում է առողջության վատացման պատճառ:
Նոր Արտագեսում ամիսներ առաջ վառելանյութի հոտից առաջացած թունավորման դեպքը դեռ վախով են հիշում: Դպրոցը գազիֆիկացված չէ, դասարաններն էլ ջեռուցվում են դիզելային վառելանյութով:
Միջնակարգ դպրոցում սովորում է 159, իսկ նախակրթարանում 25 աշակերտ: Նոր Արտագեսի դպրոցի փոխտնօրեն Բենիամին Ավդիշյանը նշում է, որ կրթօջախը շուրջ 25 տարի ջեռուցվում է դիզելային վառելիքով, իսկ քամու ժամանակ անհնարին է դառնում դասընթացների բավարար կազմակերպումը։
Նոր Արտագեսի դպրոցը վերջին անգամ մասամբ ներքին հարդարման է ենթարկվել 1980-ական թվականներին: Տանիքն ամբողջությամբ նորոգման անհրաժշտություն ունի, որը թեթև քամուց վնասվում է, իսկ տեղումների ժամանակ` կաթոցներն անպակաս դառնում:
Բացի տանիքից այս դպրոցում վթարային է մարզադահլիճը: Մասնաշենքի նստվածքի պատճառով հենասյուները շարժվել են և առաստաղը դարձել է վթարային: Բացի այդ՝ վտանգավոր է նաև փայտե հատակը, որի վրա քայլելն անգամ մեծ զգուշություն է պահանջում: Վթարայնության մասին հաստատել են նաև մնասնագետները և արգելել այն շահագործել։
Նոր Արտագեսի դպրոցի վերանորոգման նպատակով մարզերի առաջնահերթ լուծում պահանջող 4-րդ ծրագրով պետական բյուջեից հատկացվել է 50 մլն դրամ: Վերանորոգվելու են շենքի տանիքն ու պատուհանները։
Հայկավանի միջնակարգ դպրոցում շենքային ոչ այնքան լավ պայմանները վատ չեն անդրադարձել ուսման առաջադիմության վրա:
Դպրոցում սովորում է 131 աշակերտ, անցած տարում 15 շրջանավարտից 7-ն ընդունվել ու սովորում է պետական բարձրագույն ուսումնական հաստատությունում: Աշակերտների թիվն էլ աստիճանաբար նվազում է:
Դպրոցի ջեռուցումը կազմակերպվում է գազի տուրբո վառարանների միջոցով, որը քամու ժամանակ անջատում են` տհաճ միջադեպերից խուսափելու նպատակով: Վառարանները վառում են ծախսը տնտեսելով` առավոտյան 8-30 մինչև 10-30, իսկ հյուսիսային կողմում 5-6 ժամ:
Հայկավանի միջնակարգ դպրոցի տնօրեն Արամայիս Ղազարյանը նշեց, որ դպրոցը վերջին անգամ վերանորոգվել է 1986թ-ին, ունեցածը հնարավորինս պահպանում են, սակայն նորոգման կարիք ունի:
Հայկավանի միջնակարգ դպրոցի վերանորոգման համար կառավարությունը հրատապ խնդիրների լուծման 4-րդ ծրագրով հատկացրել է 58 մլն. դրամ:
Արմավիրի մարզի դպրոցների շենքային պայմաններիի վիճակն ուսումնասիրելու ընթացքում տարածքային կառավարման նախարար Արմեն Գևորգյանը նշեց, որ մարզին տրամադրված միջոցների մեծ մասն ուղղվում են դպրոցների վերանորոգմանը, քանի որ կառույցները անմխիթար վիճակում են: Ծրագրի շրջանակներում կան դպրոցներ, որոնց վերանորգումը շարունակական է դարձել` ուժեղացվում են, ամրացվում, որոնց վրա մեծ գումար է ծախսվում: Աշխատանքները պետք է արվեն որակով, նախանշված ժամկետում և ողջ ծավալով։
