Աննա Նազարյան
«Ռադիոլուր»
Սովորաբար, երբ շփման գծում հրադադարի ռեժիմի խախտման դեպքեր են արձանագրվում, հայ քաղաքագետներն ու վերլուծաբաններն ասում են, որ դա երկու երկրների նախագահների հանդիպումից առաջ որոշակի մեսիջ է: Այս ժամանակահատվածում որևէ հանդիպում նախատեսված չէ, ավելին՝ Սարգսյան-Ալիև հանդիպումներն ընդհատված են նախորդ տարվա հունգարա-ադրբեջանական նենգ գործարքից հետո, սակայն Տավուշի մարզի մի քանի գյուղում երկու օր առաջ ողջ գիշեր չդադարեցին կրակահերթերը:
Ադրբեջանագետ Սարգիս Ասատրյանը հրադադարի ռեժիմի խախտումները Հայաստանում սպասվող նախագահական ընտրություններով է պայմանավորում: Ադրբեջանցիները փորձում են լարում մտցնել Հայաստանում,կարծում է նա: Սակայն հակառակորդն արժանի հակահարված է ստացել, ասում է Սարգիս Ասատրյանը։
Քաղաքագետ Նարեկ Գալստյանի կարծիքով՝ սակայն վերջին օրերին հայ-ադրբեջանական շփման գծում հրադադարի ռեժիմի խախտումները Ադրբեջանում ներքաղաքական հարցերից ու դժգոհություններից հանրության ուշադրությունը շեղելու նպատակ ունեն: Խոսքը՝ Իսմայիլիի շրջանում տեղի ունեցած բախումերից հետո ալիևյան կլանում տիրող տագնապը փարատելու մասին է: «Նրանք փորձում են թարմացնել թշնամու կերպարը»,- ասում է:
Ալիևյան կլանն այդպիսով փորձում է հասկացնել սեփական հանրությանը, որ միասնական լինեն, ավելացրեց քաղաքագետը: Այդ դեպքում ստացվում է, որ հոկտեմբերին Ադրբեջանում սպասվող նախագահական ընտրություններից առաջ հնարավոր դժգոհությունները կանխելու նպատակով հարկ կլինի ավելի լայնածավալ գործողությունների դիմել:
Դիտարկմանն ի պատասխան քաղաքագետն ասաց, որ իռացիոնալության ֆակտորն պետք է հաշվի առնել:
