Մեր մայրաքաղաքի ողջ կոլորիտն ու պատմական դիմագիծը՝ մեկ գրքում. «Երևան. 20-րդ դար»: Գրքի հրատարակությունն իրականացրել է «Մեդիամաքս» մեդիա-ընկերությունը՝ «Երեմյան Փրոջեքթս» կազմակերպության հետ համատեղ:
«Երևան. 20-րդ դար» գրքի 2-րդ հրատարակությունը 2012-ին լույս տեսած նույնանուն գրքի լրամշակված տարբերակն է, որտեղ ներկայացված են երևանցիների ամենասիրելի հասցեները. ոչ միայն շենքեր, այլև Երևանի անկրկնելի միջավայրը՝ մարդկանց հիշողությունների, ուշագրավ պատմությունների ու լուսանկարների միջոցով: Գրքի հրատարակությունն իրականացրել է «Մեդիամաքս» մեդիա-ընկերությունը՝ «Երեմյան Փրոջեքթս» կազմակերպության հետ համատեղ: «Երեմյան Փրոջեքթսը» միշտ եղել է մեր մայրաքաղաքին վերաբերող նախաձեռնությունների կողքին: Այս մեկը ևս այդ ցանկից է»,-ասում է ընկերության հիմնադիր Դավիթ Երեմյանը. «Երևանն այն քաղաքներից է, որն ունի մեծ ներուժ՝ դառնալու աշխարհի ամենահյուրընկալ, մշակույթուվ հարուստ ու ջերմ քաղաքներից մեկը, քաղաք, որտեղ միշտ վերադառնում են, աշխատում և արարում են»:
«Մեդիամաքս» ընկերության տնօրեն Արա Թադևոսյանի տեղեկացմամբ գիրքն արդեն վաճառվում է «Բուկինիստ» գրախանութների ցանցում և «Լավաշ» ռեստորանի խանութում: Վաճառքից գոյացած ողջ հասույթն ուղղվելու է Երևանում նոր մշակութային նախագծերի իրականացմանը:
Շնորհանդեսին ներկա Արմեն Ամիրյանը, որպես այդիպիսին, առաջարկեց ստեղծել նմանատիպ գրքերի տարածմանն օժանդակող գրախանութ կամ գրադարան, անհրաժեշտության դեպքում՝ նաև նախարարության օժանդակությամբ:
Անդրադառնալով նոր հրատարակությանը՝ նախարարը հղում կատարեց պատմիչներին ու Երևանի մասին նրանց հնագույն գրավոր հիշատակումներին . «Պատմիչների վկայություններով՝ Երևանն ամենաարևաշատ ու առևտրաշատ քաղքաներից մեկն էր: Կարծում եմ, որ այս գիրքը ևս մեր արևաշատ ու, ինչու չէ, նաև առևտրաշատ քաղաքի մասին է պատմում: Գիրք, որը հիշողությունը կարող է կամրջել մեր ապագայի հետ»:
Նախարարի մեծ ցանկությունն է, որպեսզի ստեղծվի գրքի նաև էլեկտրոնային տարբերակը, ինչը հնարավորություն կտար մեր քաղաքի գույների, պատմության ու շնչառության մասին պատմել նաև աշխարհին:
