Նորանկախ Հայաստանի պատմության մեջ ես չեմ հիշում որևէ ժամանակաշրջան, երբ Սևանա լճից ջրառ իրականացնելու հարցը չի քննարկվել միմյանց հակասող կարծիքների բախման միջավայրում: Այս մասին ԱԺ-ում հայտարարեց ՀՀԿ խմբակցության պատգամավոր Արման Սաղաթելյանը: Ըստ նրա՝ պատճառն այն է, որ մինչև անկախությունն էլ հարցը քննարկվել է, բայց իշխանության կուլուարներում:
«Անշուշտ, Սևանը էկոհամակարգ է, էներգետիկական օբյեկտ է, ոռոգման ջրի որոշակի պաշար է, քաղցրահամ ջրի խոշոր բասեյն, ձկնաբուծական առումով մեծ պոտենցիալ ունեցող վայր՝ ինձ համար հանգստի հարթակ: Հասկանալի է, որ հակադրելով այս տարբեր ընկալումները մենք երբեք ընդհանուր հայտարարի չենք գա»,- ասաց Արման Սաղաթելյանը։
Պատգամավորը նշեց, որ հավելյալ ջրառը կազդի էկոհամակարգի վրա։
Նա նշել է, որ կառավարությունը պետք է ծանրութեթև անի, թե ինչի կհանգեցնի որոշման ընդունումը և ինչի կհանգեցնի այն չընդունելը: Սաղաթելյանի խոսքով՝ ակնհայտ է, որ որոշումը չընդունելն ավելի ծանր կնստի մեզ վրա:
