«Ոսկե ծիրան» միջազգային կինոփառատոնի կազմակերպիչներն այսօր ներկայացրել են փառատոնի «ամենահամեղ» մասը: Շտապենք ասել, որ դա ծիրանը չէ:
«Ոսկե ծիրանի» «ամենահամեղ մասն» ըստ փառատոնի ծրագրերի տնօրեն Միքայել Ստամբուլցյանի՝ փառատոնի արտամրցութային ծրագիրը, որի ցանկում են՝ Երևանյան պրեմիերաներ, Հետահայաց ցուցադրություններ և Հարգանքի տուրք ծրագրերը:
Արտամրցութային ծրագրում ավանդույթի համաձայն ներառված են Կաննի, Բեռլինի և Վենետիկի միջազգային կինոփառատոնների մրցանակակիր ֆիլմերը: Դրանց թիվն այս տարի գերազանցում է 70-ը:
Փառատոնի հյուրերի բաժնի ղեկավար Վարվառա Հովհաննիսյանի բնորոշմամբ, այս տարի յուրահատուկ հարուստ է Երևանյան պրեմիերաների ցանկը:
«Դափնեկիների» թվում են՝ Վենետիկի կինոփառատոնում «Ոսկե առյուծ» ստացած ֆիլիպինցի ռեժիսոր Լավ Դիասի «Հեռացած կինը», Բեռլինի կինոփառատոնում «Ոսկե արջի» արժանացած հունգարացի Իլդիկո Էնյեդիի «Մարմնի և հոգու մասին» ֆիլմը, «Արծաթե արջի» արժանացած և մեծ աղմուկ հանած ֆին կինոռեժիսոր Ակի Կաուրիսմյակի «Հույսից անդին» ժապավենը և այլն: Կաննի կինոփառատոնից ծրագրում ընդգրկված են՝ կորեացի ռեժիսոր Հոն Սան-սուի «Հաջորդ օրը», ֆրանսիացի ռեժիսոր Ֆրանսուա Օզոնի «Երկդիմի սիրեկանը»:
Փառատոնի ծրագրերի տնօրեն Միքայել Ստամբուլցյանն ասում է, որ այս տարի հարուստ է նաև արտամրցութային ծրագրում ընդգրկված Հարգանքի տուրք և Հետահայաց ցուցադրություննեի ծրագիրը
«Հետահայաց ցուցադրություններ»-ի ծրագիրը կներկայացնի բրիտանացի հայտնի ռեժիսոր Հյու Հադսոնի ֆիլմերի ընտրանին:
Հարգանքի տուրք կմատուցվի ֆրանսիացի ռեժիսոր Ժան-Պիեռ Մելվիլի հարյուրամյա հոբելյանի կապացությամբ: Կցուցադրվի ռեժիսորի ֆիլմերի ընտրանին՝ «24 ժամ ծաղրածուի կյանքից», «Ստվերների բանակը», «Լեոն Մորեն, քահանա», «Ծովի լռությունը», «Կարմիր շրջան»: Ֆրունզե Դովլաթյանի 90, Յուրի Երզնկյանի 95 և Սերգեյ Իսրայելյանի 80-ամյա հոբելյանների կապակցությամբ կցուցադրվեն ռեժիսորների մասին պատմող կենսագրական ֆիլմեր:
Կցուցադրվի Անջեյ Վայդայի վերջին ֆիլմը՝ «Հետպատկերներ Անջեյ Վայդա»: Լեհական կինոյի մեծ վարպետը կյանքից հեռացավ 2016-ին, 90 տարեկանում»:
Հայեր՝ հայացք ներսից և դրսից.
Ըստ ծրագրի համակարգող Անի Հակոբյանի, այստեղ հայտնվում են այն ֆիլմերը, որոնք չեն տեղավորվել «Հայկական համայնապատկեր» ծրագրում: Իսկ «Հայկական համայնապատկերում» չեն «տեղավորվում» այն ֆիլմերը, որոնց հեղինակները հայ չեն: Հայաստանի մասին պատմող հայ և օտարազգի հեղինակների ֆիլմերին անդրադարձող ծրագրում այս տարի ներառված է 36 ֆիլմ, որոնց թվում է ֆրանսիացի ռեժիսոր Սեմյուել Օբինի՝ Արա Գյուլերի մասին պատմող վավերագրական ֆիլմը:
