Յուրաքանչյուր ընտանիքում երեխայի ծնունդը սպասված ու անփոխարինելի զգացողություն է: Փոքրիկը փոխում է ընտանիքի բոլոր անդամների կյանքը մի քանի օրում արդեն:
Ցավոք, միշտ չէ, որ լույս աշխարհ եկած փոքրիկները առողջ են ծնվում: Սթրես, բնապահպանական խնդիրներ, վնասակար սովորություններ, ժառանգական գործոն: Պատճառները երկար կարելի է թվարկել։ Ինչպես աշխարհում, այնպես էլ Հայաստանում ծնվող փոքրիկների մի մասը բնածին արատներով է ծնվում: Բնածին արատների առաջին եռյակում կենտրոնական նյարդային (ԿՆՀ) և հենաշարժողական համակարգերի, սրտի բնածին արատներն են: Մահացության ցուցանիշով նրանք, առաջատարն են:
Վիճակագրության համաձայն, ամեն տարի ծնված 1000 երեխաներից 9-10 այս խնդիրն ունեն ՍԲԱ (0,9-1%): Հայաստանում տարեկան միջինը ծնվում է 45 հազար երեխա, դրանցից 400- 500 սրտի բնածին արատով։ «Ռադիոլուրի » զրուցակցի որդին՝ 11-ամյա Մխիթարը, սրտի բնածին արատով է ծնվել: Նրանք Գեղարքունիքի մարզի Ակունք համայնքից են: Մայրը՝ Լաուրան, պատմում է, որ չնայած հղիության շրջանում ՈւՁՀ անցել է, սակայն խնդրի մասին չի էլ իմացել:
Աշխարհում վաղուց արդեն կիրառվում է մինչ երեխայի ծնունդը պտղի մոտ տարբեր հիվանդությունների ժամանակին ախտորոշման պրակտիկան: Հայաստանը փորձում է հետ չմնալ, սակայն միշտ չէ, որ հաջողվում է:
Հայ մասնագետներն առաջիկա երկու օրերին հնարավորություն ունեն կենդանի լեգենդի հետ շփվելու: ՀՀ առաջին տիկին Ռիտա Սարգսյանի հրավերով Երևանում է Ֆիլիպ Ջենթին: Պրոֆեսորի կողմից մշակված ֆետոմետրիկ սանդղակները տեղադրված են յուրաքանչյուր օգտագործվող ուլտրաձայնային սարքում: Նա էխոկարդիոգրաֆիայի հիմնադիրն է: Հայ մասնագետներն այս օրերին պտղի էխոսրտագրության մասին կլսեն անձամբ Ֆիլիպ Ջենթիից: Առաջին անգամ Հայաստանում գտնվող գիտնականը հիացած է Հայաստանով ու հայերով, սակայն մեր երկրի մասին դեռ շատ բան չգիտի.
«Ես բավականաչափ տեղեկություն չունեմ, թե ինչպես է Հայաստանում ուլտրաձայնային հետազոտությունն արվում: Բայց ես ունեմ ընկերներ, որոնք ինձ պարբերաբար իրենց հետազոտությունների պատկերներն են ուղարկում, ինչի հիման վրա կարող եմ ասել, որ ամեն բան լավ է»:
Աշխարհում արդեն ոչ միայն ներարգանդային փուլում հիվանդություններն են հայտնաբերում, այլ դեռ չծնված երեխայի՝ պտղի վիրահատություններ են կատարում: Նախորդ տարի աշնանը Մեծ Բրիտանիայի բնակիչ Ֆրենկի Լեւիսի ողնաշարը վիրահատվեց դեռ չծնված: Նրա մայրը հղիության 24-րդ շաբաթում էր գտնվում: Վիրահատությունը բարեհաջող անցավ, երեխան այժմ շարժում է ոտքերը, ոտնաքայլակով քայլում: Հայաստանում, ցավոք, նման վիրահատություններ չեն արվում:
Մանկաբարձության ու գինեկոլոգիայում ուլտրաձայնային ախտորոշման հայկական ասոցիացիայի նախագահ Կարիեն Թոխունցը մեզ հետ զրույցում խոստովանեց՝ այդ փուլին հասնելու համար անելիքները շատ են:
