«Բանակային թեման իմ լուսանկարչության առանցքային թեմաներից է, գուցե պատճառն այն է, որ իմ զինվորական ծառայությունն անցկացրել եմ լուսանկարչական ապարատով: Իսկ ինչու՞ «Հողի դողը ոտքերի տակ». այս դողը հայրենիքի հանդեպ ունեցած սիրուց է, որն անցնում է հողին՝ նրանից նորից փոխանցվելով մեզ»,- «ՀԲԸՄ-Հայաստան»-ի սրահում այսօր շնորհանդեսի եկածներին ասաց լուսանկարիչը:
«Սա վաղվա օրվա հանդեպ վստահություն, հպարտություն ու հայրենասիրություն ներշնչող գիրք է։ Ըստ էության պատերազմի մեջ գտնվող երկրում մենք ներկայացնում ենք մեր խաղաղ հայրենիքը, նրա ապահով վաղվա օրն ու ապահով ներկան»,- ասաց մշակույթի նախարար Արմեն Ամիրյանը։
Գիրքը հրատարակվել է մշակույթի նախարարության աջակցությամբ:
«Պատկերագիրքը նվիրել ենք Հայոց բանակին: Այն չէր հրատարակվի, եթե չլիներ պարոն Ամիրյանի նախաձեռնությունն ու աջակցությունը: Հանդիպեցինք, նա ինձ քաջալերեց բանակային թեմայով լուսանկարներս իրար գլուխ հավաքելու և հրատարակելու հարցում, իսկ ես ունեի վաղեմի նպատակ՝ ունենալ խոշոր լուսանկարչական ալբոմ»:
Լուսանկարներն ուղեկցվում են Լևոն Խեչոյանի տեքստերով: Ինչպես լուսանկարչի, այնպես էլ գրողի հերոսներն ունեն «…ճակատագրին հպատակվելու, հավատարմության և Աստված ունենալու հասունություն…»:
Երիտասարդ լուսանկարչի տեսախցիկի օբյեկտիվում հայրենիքի սահմանն է ու սահմանի պաշտպանը: «Հողի դողը ոտքերրի տակ»-ը Դավիթ Հակոբյանի առաջին մեծ պատկերագիրքն է , թեև մինչ օրս հրատարակվել են նրա ցուցահանդեսներն ամփոփող գրքույկներ: Իսկ լուսանկարները շրջել են տարբեր երկրներում՝ ինչպես խմբային, այնպես էլ անհատական ցուցահանդեսներով:
