Արդարադատության նախարարությունը փոփոխություններ է առաջարկում «Տեղեկատվության ազատության մասին» օրենքում։ Քաղաքացիական հասարակության ներկայացուցիչները օրինագծի որոշ դրույթների հետ կապված մտահոգություններ ունեն: Մասնավորապես՝ առաջարկվում է ստեղծել Տեղեկատվության ազատության խորհուրդ, որը գործելու է Մարդու իրավունքների պաշտպանի աշխատակազմին առընթեր:
Նոր փոփոխություններով՝ նախատեսվում է զարգացնել արտադատարանական մեխանիզմները և տեղեկատվության ազատության ոլորտում համապատասխան լիազոր մարմին ստեղծել։ Այն գործելու է Մարդու իրավունքների պաշտպանի աշխատակազմին առընթեր և կզբաղվի վերը նշված խնդիրների կարգավորմամբ: Որ ոլորտը բարեփոխումների կարիք ունի՝ բազմիցս բաձրաձայնել է հատկապես Ինֆորմացիայի ազատության կենտրոնը: Միևնույն ժամանակ, ուսումնասիրելով օրենքի նոր նախագիծը, կազմակերպության ղեկավար Լիանա Դոյդոյանը պնդում է, որ այն հետընթաց է և չի արտացոլում կառավարության հայտարարած բարեփոխումների էությունը:
Իսկ ի՞նչն է խանգարում ՄԻՊ-ի գրասենյակին իրականացնել տեղեկատվության ազատության պաշտպանության գործառույթները: Անդրադառնալով հարցին՝ Մարդու իրավունքների պաշտպանի աշխատակազմի իրավական վերլուծության վարչության պետ Լուսինե Սարգսյանը հայտնեց, որՎենետիկի հանձնաժողովը թե ՀՀ-ին, թե այլ երկրներին առաջարկել է զերծ մնալ օմբուդսմենական այլ հաստատություններ հիմնելուց: Առավել նպատակահարմար է ուժեղացնել ՄԻՊ-ի ազգային հաստատությունը՝ տալով նրան բոլոր իրավական հիմքերը: Ուստի՝ ՄԻՊ-ի գրասենյակը դեմ չէ, որ այլ լիազոր մարմին էլ լինի, միայն թե այն չպետք է կրկնի ՄԻՊ-ի գործառույթները:
Օրենքի նոր նախագիծը, ըստ էության, առաջին հերթին վերաբերում է լրագրողներին: Ուստի՝ «Ռադիոլուրը» նաև գործող լրագրողներից հետաքրքրվեց, թե արդյո՞ք տեղեկատվության ազատության արտադատարանական մարմին ստեղծելու անհրաժեշտություն կա:
Ի պատասխան բոլոր մտավախություններին՝ արդարադատության փոխնախարար Սուրեն Քրմոյանը հավաստիացնում է՝ նոր մարմնի ստեղծումն ինքնանպատակ չի լինելու և այն դեռ քննարկման փուլում է, որին կարող են մասնակցել շահագրգիռ բոլոր կողմերը:
