Երևանում 10 օր շարունակվող աննախադեպ իրադարձությունները փորձություն են ոչ միայն պետության ու հասարակության, այլ նաև լրատվամիջոցների համար: Հերթական փորձաշրջանից ԶԼՄ-ները դուրս են գալիս ոչ ուժեղացած, ոչ թուլացած, այլ իրավիճակից դարձյալ դասեր քաղելու անհրաժեշտությամբ՝ կարծում է Խոսքի ազատության պաշտպանության կոմիտեի նախագահ Աշոտ Մելքիյանը: Նրա գնահատմամբ՝ ընդհանուր առմամբ հասարակությանը հաջողվեց տեղյակ պահել թե ինչ կատարվում Խորենացու կենտրոնում, բայց նաև իրավիճակը հերթական անգամ ցույց տվեց, որ լրատվադաշտում լուրջ խնդիրներ կան:
Իրադարձությունների առաջին օրը խուճապի մեջ ու իրավիճակում կարծես թե չկողմնորոշված, հաջորդ օրերին որոշակիորն արտակարգ ռեժիմի մեջ մտած, լավ թե վատ, բայց իրադարձությունների օպերատիվ լուսաբանմամբ: Լրատվամիջոցների աշխատանքը վերջին 10 օրերին այսպես է գնահատում Խոսքի պաշտպանության կոմիտեի նախագահ Աշոտ Մելիքյանը:
Նրա կարծիքով ՝ իրավիճակը հերթական անգամ ցույց տվեց առկա բացերն ու խնդիրները հատկապես հեռարձակող լրատվամիջոցների աշխատանքում:
Հեռուստաընկերությունների լուսաբանումը զգուշավոր էր, ըստ իրադարձությունների զարգացման՝ որոշակի ընդհանուր տոնայնություններով:
Օրինակ, ՊՊԾ գնդի գրավման առաջին արձագանքները իրադարձությունների մեկնարկին խիստ կոշտ որակումներով էին, հաջորդ օրերին որակումները փոխվեցին, լրագրողական բառապաշարը մեղմվեց: Միտումը, ըստ Մելիքյանի, տեսանելի էր բոլոր հեռուստաընկերությունների լուսաբանումներում։ «Համենայն դեպս՝ առաջին երկու օրերին ակտիվորեն կիրառվող ահաբեկչություն բառը, ընդհանրապես լեքսիկոնը հաջորդ օրերին փոխվեց, մեղմացավ՝ ընդ որում զարմանալի օրինաչափությամբ բոլոր հեռուստաընկերույթուններում»:
Վերջին օրերին լուսաբանման տոնայնությունը նորից, ըստ փորձագետի, փոխվել է, գնահատականները կրկին ավելի կտրուկ են դարձել՝ պայմանավորված իրավիճակի փոփոխությամբ: Աշոտ Մելիքյանի գնահատմամբ՝ իրավիճակն արտառոց է ոչ միայն իրադարձությունների սրությամբ, այլ նաև հանգամանքով, որ երկար ժամանակ իշխանությունը ձեռնպահ էր մնում մեկնաբանությունից, դրանով էլ իր հերթին դժվարացնում լրատվամիջոցների աշխատանքը: Ըստ էության՝ դեմ հանդիման զինված խումբն ու իրավապահներն էին, հասարակությունը մնացել էր մի կողմում՝ նաև տեղեկատվություն ստանալու իր պահանջով:
Կայքերն ու էլեկտրոնային լրատվամիջոցներն իրենց մեծ բազմազանությամբ ավելի օպերատիվ էին ու ավելի շատ տեղեկատվություն տրամադրեցին, բայց այս դաշտում էլ մարտահրավերը հայտնի խնդիրներն են: «Իհարկե, այստեղ էլ կարող են մանիպուլյացիաների փորձեր կատարվեն, ասեկոսեներ լինեն, բայց հասկացող, մտածող ընթերցողը կարող է ասեկոսեն տարբերել փաստից, լրատվությունը՝ պրոպագանդայից»:
Աշոտ Մելիքյանի ամփոփմամբ՝ ընդհանուր առմամբ, հաջողվեց հասարակությանը տեղեկացնել , թե ինչ է տեղի ունեցել ու տեղի ունենում Խորենացի փողոցում, բայց նաև հերթական անգամ լրատվամիջոցներին իրավիճակից դասեր քաղելու խնդրի առջև դրեց:
Խոսքի ազատության պաշտպանության կոմիտեն այսօր նաև ամփոփում էր տարվա երկրորդ եռամսյակի արդյունքները: Այս ժամանակահատվածի հիմնական առանձնահատկությունն այն է,որ ընդդեմ լրատվամիջոցի ընդամենը 1 նոր դատական հայց է ներկայացվել: Վիրավորանքի և զրպարտության ապաքերականացմանը հաջորդած ժամանակահատվածի համար սա, ըստ Մելիքյանի, բացառիկ երևույթ է: Փոխարենը վերջին եռամսյակում գրանցվել են մի քանի աղմկահարույց դեպքեր, որոնց առնչությամբ քրեական գործեր են հարուցվել 2 լրատվամիջոցի ներկայացուցիչների նկատմամբ դրամաշորթության մեղադրանքով:
