Համահայկական բնապահպանական ճակատ քաղաքացիական նախաձեռնությունը, ինչպես նաեւ մի շարք բնապահպաններ մերժել են Հայաստանի ամերիկյան համալսարանում հանքարդյունաբերությանը նվիրված Համաշխարհային բանկի հայաստանյան գրասենյակի այսօր կազմակերպած աշխատաժողովին մասնակցելու հրավերը։
Նրանք ՀԲ- ին ուղղած բաց նամակում քննդատում են միջազգային այս կազմակերպության գործունեությունը Հայաստանում եւ նրա քաղաքականությունը հանքարդյունաբերության ոլորտում։ «Մենք չենք հավատում, որ ընտրության հնարավորությունը սահմանափակվում է «չարյաց փոքրագույններով»՝ հանք կամ գործազրկություն, աճի վրա հիմնված տնտեսություն կամ աղքատություն: Մենք տեսնում ենք իրական այլընտրանքներ, որոնց Համաշխարհային բանկն իր նեոլիբերալ քաղաքական հավատամքի բերումով ոչ միայն չի խթանում, այլև խանգարում է դրանց ձևակերպվել ու կյանքի կոչվել»,- հայտարարել են բնապահպանները։
