Մինչ աշխարհն այս օրերին հետևում է Հայաստանին, հայաստանյան հասարակությունը տարբեր ընկալումներ ունի Հռոմի Սրբազան քահանայապետ Ֆրանցիսկոս պապի Հայաստան այցից: Կյանքը նույն հունով շարունակվում է՝ բացառությամբ մի քանի փողոցների, որտեղ պապի այցի հետ կապված երթևեկությունը ժամանակավորապես դադարեցվել է:
Հասարակության մի մասը անհամբերությամբ է սպասում Պապի հետ հանդիպմանը և միջոցառումներին, որոնք տեղի են ունենում Հռոմի Սրբազան քահանայապետի այցի շրջանակներում: Մի մասն էլ միջոցառումներին հետևում է տանը՝ հեռուստացույցով:
Հասարակության սպասելիքները Հռոմի պապի այցելությունից ևս շատ տարբեր են:
Հիշեցնենք, որ Հռոմի Ֆրանցիսկոս պապի՝ ՀՀ կատարած այցը կշարունակվի նաև վաղը: Մայր Աթոռ Սուրբ Էջմիածնում Հռոմի Սրբազան քահանայապետը հանդիպում կունենա Հայ Կաթողիկե եպիսկոպոսների հետ, կմասնակցի Սուրբ պատարագի արարողությանը եւ էկումենիկ ճաշկերույթի։ Ֆրանցիսկոս պապը հանդիպում կունենա նաեւ Հայ եկեղեցու պատվիրակների եւ բարերարների հետ: Հռոմի սրբազան քահանայապետ Ֆրանցիսկոս պապը և Գարեգին Բ Ամենայն հայոց կաթողիկոսը կստորագրեն համատեղ հայտարարություն: Հովվապետերը նաեւ աղոթք կմատուցեն Խոր Վիրապի վանքում: Նույն օրը Ֆրանցիսկոս պապը Երեւանից կմեկնի Հռոմ:
