Հասարակություն

Տնային պահածոները վտանգավոր են. մասնագետի հերթական հորդորները

lianaeghiazaryan
Զգուշացեք տնային պատրաստման պահածոների կիրառումից. մշտապես կրկնվող, բայց իր արդիականությունը չկորցնող հորդորը առողջապահության ոլորտի մասնագետները կրկին փոխանցում են մեր բնակչությանը: Թարմ բանջարեղենի պակասի պայմաններում այժմ առատորեն օգտագործվում են պահածոներ, հատկապես մարզերում` տնային պատրաստման: Սրա բացասական հետեւանքները փաստում է թունավորումների վիճակագրությունը. շեշտում է Առողջապահության նախարարության առողջապահական պետական տեսչության Հիգիենայի բաժնի պետ Մարգարիտա Բաբայանը:

 

Ձմռան այս շրջանում հատկապես տնտեսուհիներն առատորեն սկսում են օգտագործել պահածոներ:  Առողջապահության նախարարությունը հարկ է համարում հերթական անգամ հանդես գալ զգուշացմամբ` հնարավորության դեպքում զերծ մնալ տնային պատրաստման պահածոների կիրառումից. նման  մթերքի օգտագործումն անպայման ուղեկցվում է բոտուլիզմի դեպքերով:  Իսկ այս տարվա առաջին դեպքերն արդեն կան: Սրտխառնոց, փսխում, գլխապտույտ, գլխացավ, ձայնի խռպոտություն, կոպերի իջեցում, բերանի չորություն, կլման ակտի խանգարում: Այս ախտանիշերից անգամ որոշների դեպքում պարտադիր է այցը բժշկի. սրանք բոտուլիզմին են բնորոշ:

Առողջապահության նախարարության առողջապահական պետական տեսչության հիգիենայի բաժնի պետ Մարգարիտա Բաբայանը միաժամանակ հիշեցնում է ` թունավորված սնունդը ոչ համային, ոչ հոտային որեւէ առանձնահատկությամբ չի առանձնանում, կարող է օրգանիզմում գաղտնի զարգանալ մինչեւ 10 օրվա ընթացքում ու մահվան ելք ունենալ անհապաղ բժշկի չդիմելու դեպքում: Բաբայանը խորհուրդ է տալիս թունավորման առաջին ախտանշանների ի հայտ գալուն պես դիմել բժիշկի, իսկ մինչ շտապ օգնության ժամանելը կատարել ստամոքսի լվացում, ընդունել ակտիվացված

«Մուրաբաներն անվտանգ են, քանի որ դրանցում շաքարի տոկոսը 50 տոկոսից ավելի է: Ամենավտանգավորը լոլիկի ու վարունգի մարինադներն են: Բաց տարաների մեջ կարելի է պահել: Կարող են կարմիր պղպեղը պատրաստել սեպտեմբեր-հոկտեմբերին ու կաթսաներով պահել սառնարանում, բայց ոչ հերմետիկ տարաներում»:

Բայց պահածոյացումից ու պահածոների օգտագործումից հրաժարվել հայ տանտիկինները դժվարանում են: Սա նաեւ սոցիալական լուրջ խնդիր է, ողջ ձմեռ մարդիկ հատկապես մարզերում սպառում են գյուղատնտեսական տարում իրենց մշակած բանջարեղենի պահածոները: Գործարաններում արտադրվածը գնելը թանկ է արժենում, բացատրում են:  Բայց գործարանների արտադրածն անվտանգ է, հայտարարում է առողջապահության նախարարության ներկայացուցիչը: Չկան արդյոք տնային պայմաններում պահածոյացումն ավելի անվտանգ կազմակերպելու արդի խորհուրդներ: Երբեմն տանտիկինները որոշ պահածոների մեջ ասպիրին են դնում` մեկնաբանելով, որ դա օգնում է չեզոքացնել բոտուլիզմի սպորները:

Մարգարիտա Բաբայանը նկատում է` որեւէ հավելյալ միջոց չի օգնում: Եթե սպորը կա, անօդ պայմաններում անպայման զարգանում է: Օգնում են միայն շատ բարձր` 120-130 աստիճան ջերմային մշակումը եւ բարձր ճնշումը, ինչը հնարավոր է ապահովել միայն գործարանային պայմաններում: Ելք է պահածոն արդեն բացելուց հետո մինչեւ 20 րոպե եռացնելը: Թվում է` սրանք տարրական խորհուրդներ են, արդեն բոլորին հայտնի ու բազմիցս լսված, բայց թունավորումների վիճակագրությունը պարտադրում է սրանք կրկին հիշեցնել: Մարգարիտա Բաբայանը հավելում է` պայածոյացմանը հրաշալի այլընտրանք է պտուղ-բանջարեղենի սառեցումը, չորացումը, թթվեցումը` ոչ հերմետիկ տարաներում:

«Կարելի է չորացնել, սառեցնել, հատապտուղները շաքարով խառնած պահել սառնախցիկում: Տարբեր մթերք կարելի է այդպես պահել, եւ անվտանգ է, եւ որակական հատկանիշերով չի զիջում»:

Back to top button