«Հայաստանի հետ մեր ավանդական ու բարեկամական հարաբերությունները զարգանալու մեծ հեռանակար ունեն», այսօր «Ռադիոլուրին» ասել է Վրաստանի արտգործնախարար Գեորգի Կվիրիկաշվիլին՝ անդրադառնալով Հայաստանի արտգործնախարար Էդվարդ Նալբանդյանի հետ հանդիպմանը: Հիշեցնենք` Էդվարդ Նալբանդյանն այսօր Թբիլիսիիում մասնակցել է Արեւելյան գործընկերության երկրների ԱԳ նախարարների ոչ պաշտոնական վեցերորդ հանդիպմանը:
Արեւելյան գործընկերության երկրների ԱԳ նախարարների ոչ պաշտոնական վեցերորդ հանդիպմանը ուշադրություն են դարձվել հատկապես Ռիգայի գագաթնաժողովում սահմանված առաջնահերթությունների իրագործմանը, հանդիպման ավարտին տեղի ունեցած մամուլի ասուլիսում արձանագրեցին մասնակիցները:
Եվրահանձնակատար Յոհանես Հանը նկատեց, որ Վրաստանը առաջընթաց է գրանցել Եվրամիության հետ մերձեցման ճանապարհին: «Այստեղ մի շարք հանդիպումներ ունեցանք. կարող եմ ասել, որ Վրաստանը վերջին տարիներին առաջընթաց է գրանցել։ Իմ գործընկերի հետ ունեցած քննարկումներից պարզ դարձավ, որ ամեն ինչ ճիշտ ուղղությամբ է գնում»:
Այս հանդիպման առանցքային թեմաներից էր անդամ երկրների առողջապահության համակարգը, առկա խնդիրները: Ինչպես Հայաստանի աողջապահության նախարար Արմեն Մուրադյանը նշեց, Հայաստանը գրեթե ամբողջովին կատարել է ստանձնած պարտավորությունները։ «Այս հանդիպմանը քննարկել ենք մեր երկրներում միջազգային բժշկասանիտարական նորմերի ներդրման ընթացքը: Հայաստանը ստանձնած պարտավորությունները գրեթե կատարել է. ցանկի կետերից մեկը ծրագրում ենք ավարտել մյուս տարվա սկզբին: Իսկ պատվաստումների հարցում մենք ունենք ամենաբարձր ցուցանիշներից մեկը, որի մասին այստեղ հատուկ նշվեց և դրական արձագանք ստացավ մասնակիցների կողմից»:
Հիշեցնեմ, 2012թ.-ից իրակացվող «Արեւելյան գործընկերության» նախագիծը նպատակաուղղված է ԵՄ- ի հետ Վրաստանի, Ուկրաինայի, Մոլդովայի, Ադրբեջանի, Բելառուսի ու Հայաստանի քաղաքական ու տնտեսական ինտեգրացմանը:
Վրաստանը, Ուկրաինան և Մոլդովան 2014թ. ԵՄ հետ կնքել են ասոցացման մասին համաձայնագիրը, իսկ Բելառուսն ու Հայաստանը Եվրասիական միության անդամներ են: Սակայն ինտեգրացիոն տարբեր ուղղությունները ընդհանրապես մեզ չեն խանգարում, «Ռադիոլուրի » հետ զրույցում ասաց Վրաստանի արտգործնախարար Գերոգի Կվիրիկաշվիլին։
Նրա խոսքով Հայաստանի հետ ավանդական ու բարեկամական հարաբերությունները զարգանալու մեծ հեռանկար ունեն։ «Հայաստանի արտգործնախարարի հետ քննարկեցինք մի շարք կարևոր հարցեր, անդրադարձանք հայ-վրացական սահմանին վերաբերող կարևոր խնդիրներին: Ես ընդունել եմ իմ գործընկերոջ հրավերը պաշտոնական այցով լինել Հայաստանում, որի ընթացքում մենք եւս մեկ անգամ կանդրադառնանք երկուստեք կարևոր հարցերին»,- «Ռադիոլուրի» հետ զրույցում շեշտեց նախարարը։
