Կյանքից հեռացել է ՀՀ արվեստի վաստակավոր գործիչ՝ Ֆելիքս Արամյանը: Նա ծնվել է 1936 թվականի նոյեմբերի 1-ին: Ավարտել է Էստոնիայի Տալլին քաղաքի պետական կոնսերվատորիան եւ իր ողջ կյանքը նվիրել է երաժշտությանը, արվեստին: Հեղինակել է ավելի քան 150 ռադիոբեմադրությունների ու պիեսների երաժշտական ձեւավորումները, եղել է Երեւանի Հրաչյա Ղափլանյանի անվան դրամատաիկական թատրոնի հիմնադիրներից մեկը եւ ձեւավորել է բոլոր ներկայացումները: Աշխատել է Մոսկվայի(Վախթանգովի, Փոքր թատրոն), Բրատիսլավայի, Վարշավայի, Սոֆիայի, Պրահայի, Թբիլիսիի, Փարիզի, Գյումրու եւ Վանաձորի առաջատար թատրոններում: Հիմնադրել եւ երկար տարիներ ղեկավարել է Էրեբունի-Երեւան եւ Ոսկե Աշուն տոնակատարությունների մշակութային մասը:
Ֆելիքս Արամյանի շնորհիվ բազմաթիվ երաժշտական կոմպոզիցիաներով ու ձայնային էֆեկտներով է հարստացել Հայաստանի Հանրային Ռադիոյի երաժշտական ֆոնդը: Երկար տարիներ աշխատել է մաեստրոներ՝ Հովհաննես Չեքիջյանի եւ Օհան Դուրյանի հետ, ձայնագրել է վերջինիս ստեղծագործությունները, այդ թվում նաեւ 9-րդ սիմֆոնիան: Դասավանդել է տարբեր ինստիտուտներում:
Դստեր՝ ՀՀ մշակույթի վաստակավոր գործիչ Զառա Արամյանի հետ միասին, բեմադրել են այնպիսի մոնո ներկայացումներ, ինչպիսիք են Վահագն Դավթյանի ՙՌեքվիեմն՚ ու Սիլվա Կապուտիկյանի ՙՍիրո այբուբենը’: Նա իր մեծ հետքն է թողել իր ստեղծագործությունների սիրահարների եւ ուսանողների սրտերում:
Հոգեհանգիստը տեղի կունենա վաղը՝ հոկտեմբերի 26-ին, Մասիվի Սուրբ Սարգիս եկեղեցում, ժամը՝ 18.00-ին:
