Երեսուն տարվա աշխատանքից հետո ընթերցողի սեղանին է դրվել ՀՀ պատմական հանրագիտարանը: Սամվել Հակոբյանը 11 հատորները խմբագրել ու մեկտեղել է մեկ հատորում, որտեղ էլ տեղ են գտել պատմական Հայաստանի բոլոր մարզերն իրենց 1003 բնակավայրերով, Արցախ աշխարհի մասին պատմական տեղեկություններն ու Իրանում, Վրաստանում, Ադրբեջանում գտնվող հայկական հուշարձանների մասին պատմությունները: Գրքից օրինակներ կան շատ երկրների գրադարաններում, նախատեսում են ուսուցողական այս գրքով համալրել նաև հայաստանյան գրադարաններն ու դպրոցները:
Փոքրիկ Հայաստանն արդեն կարող է լինել մեր սեղանին: Սամվել Հակոբյանը ՀՀ բոլոր մարզերն իրենց 1003 բնակավայրերով և 24 հազար հուշարձաններից 20հազարից ավելին ներկայացրել է մեկ գրքում՝ 11 հաստափոր հատորները մեկտեղելով մեկում: Հայաստանի մշակութային հարուստ ժառանգությունը ներկայացնող նյութը հետաքրքել է ռուսներին և խոստացել են աջակցել գրքի հրատարակման գործում: Արդյունքում՝ գիրքը տպագրվել է ռուս բարերար Ալեքսանդր Նովոպաշինի հովանավորությամբ՝ 1000 օրինակով: Այժմ էլ ծրագրեր կան Հայաստանում և Վրաստանում, Իրանում, Ադրբեջանում գտնվող հայկական ժառանգության մասին պատմությունները հասցնել Հռոմի պապին: Գրքի շնորհանդեսը եղել է Մոսկվայի հայկական եկեղեցում, որտեղ արժանացել է մեծ արձագանքի:
Հայաստանում գիրքը բարձր են գնահատել նաև հանրապետության առաջին դեմքերը: Բրատիսլավիայի համալսարանի դոկտոր պրոֆեսոր Պավոլ Զլատոշն, ընթերցելով գիրքը, հետաքրքվել է Հայաստանի մշակութային ժառանգությամբ, և մի քանի օր տրամադրել դրանց ուսումնասիրությանը: Այսօրվա ասուլիսին ներկա էր նաև նա, ով անձամբ հայտնեց գրքի վերաբերյալ իր կարծիքը: «Դժվար է բառերով արտահայտել այն զգացողությունը, որ ունեցել եմ գիրքն ընթերցելիս։ Բոլոր ազգերը պետք է պահպանեն իրենց արմատները, իսկ հայկական յուրաքանչյուր ընտանիքում պետք է լինի ուսուցողական այս գիրքը»,- ասում է։
Այժմ գրքի հեղինակը պատրաստվում է հայաստանյան շնորհանդեսին: Գրքի օրինակներից կան աշխարհի շատ գրադարաններում: Նախատեսում են համալրել նաև հայկական դպրոցների գրադարանները, իսկ վաղը որոշակի քանակության գրքեր կհանձնվեն հայոց բանակի զորամասերին:
