Ռուսաստանը փորձում է ավելի մեծ ակտիվություն դրսևորել և ավելի գործուն դերակատարում ստանձնել տարածաշրջանում՝ անդրադառնալով Սարգսյան-Պուտին մոսկովյան հանդիպման արդյունքներին այսօր ասել է քաղաքագետ Արամ Մանուկյանը: Չի բացառվում, որ ՀԱՊԿ հարթակն օգտագործելով Ռուսաստանը փորձի ավելի ակտիվ դերակատարում ստանձնել Լեռնային Ղարաբաղի հակամարտության կարգավորման գործընթացում՝ ասել է քաղաքագետը, նաև նշել, որ այդ քայլերն առաջին հերթին կբխեն ռուսական շահերից, հետո միայն այս կամ այն չափով կբավարարեն կողմերից որևէ մեկի հետաքրքությունները: Մանուկյանը կարծում է, որ նախագահների հանդիպումը փաստեց հայ-ռուսական հարաբերությունների առանձնահատուկ բնույթը:
«Չի բացառվում, որ հենց ՀԱՊԿ-ն օգտագործելով Ռուսաստանը փորձի դա իրականացնել: Նախ այն պատճառով, որ այդ ճանապարհով շատ չի վատթարացնի հարաբերությունները Ադրբեջանի հետ, բացի այդ՝ երեկ հնչած հայտարարությունը, որ հայկական կողմը ՀԱՊԿ շրջանակներում պետք է բարձրաձայնի սահմանային լարվածության խնդիրը, կարծում եմ, համաձայնեցված է եղել ռուսական կողմի հետ»:
