ԱՄՆ Կոնգրեսի ներկայացուցիչ Քրիս Սմիթը, որը վերջերս նախագահել է Կոնգրեսի երկու լսումները՝ նվիրված Լեռնային Ղարաբաղում ապրող հայերի ծանր վիճակին և հեղինակել է Ադրբեջանի ժողովրդավարության ակտը 2015 թվականին, տարածաշրջանում անհասկանալի և սպառնալից իրավիճակի վերաբերյալ հետևյալ հայտարարությունն է տարածել.
«Այժմ, առավել քան երբևէ, նախագահ Բայդենը պետք է անհապաղ առաջ մղի Միավորված ազգերի կազմակերպության Անվտանգության խորհրդին՝ ստեղծելու մանդատ և խաղաղապահ առաքելություն՝ պաշտպանելու Լեռնային Ղարաբաղում ապրող հայերին:
Լեռնային Ղարաբաղի ժողովուրդը գտնվում է լուրջ վտանգի մեջ. նրանք ստիպված են եղել զինաթափվել և իրենց հանձնվել անողոք բռնապետին, որի կառավարությունը երկար տարիների ընթացքում բազմիցս սարսափելի չարաշահումներ է կատարել նրանց դեմ, արտահայտվել է էթնիկ զտումների իր ցանկության մասին և նույնիսկ Լաչինի միջանցքի շրջափակմամբ սովի միջոցով ցեղասպանություն է նախաձեռնել:
Ցավոք, Ադրբեջանի նախագահ Իլհամ Ալիևը բլեֆ է անվանել Բայդենի վարչակազմի հայտարարությունն այն մասին, որ «չի հանդուրժի» հարձակում։
Սեպտեմբերի 6-ին իմ նախագահած արտակարգ լսումների ժամանակ Կոլումբիայի համալսարանի «Վայրագություններ Արցախում» հետազոտական ծրագրի ղեկավարը ներկայացրեց Ադրբեջանի կառավարության կողմից կատարված ոճրագործությունների լայնածավալ ապացույցներ, ներառյալ մեղավորների ցուցակը, ովքեր պատասխանատու են:
Կոչ եմ անում նախագահ Բայդենին անհապաղ ուղարկել դիվանագետներ և փորձագետ դիտորդներ Լեռնային Ղարաբաղի տարածաշրջան՝ վերահսկելու իրավիճակը և անմիջապես զեկուցելու ցանկացած վայրագության կամ չարաշահման մասին։ Լեռնային Ղարաբաղում ապրող հայերը, ինչպես երբևէ, բոլոր իրավունքներն ունեն շարունակելու ապրել իրենց հինավուրց հայրենիքում և ապահով զգալ»:
