Օգոստոսի 7-ին Ռիո դե Ժանեյրոյում 83 տարեկան հասակում մահացել է դերասանուհի Արասի Բալաբանյանը։
Նա հոսպիտալացվել է Ռիո դե Ժանեյրոյի մայրաքաղաքի հարավային մասում գտնվող Clínica São Vicente-ում: Հիվանդանոցից մահը հաստատել են CNN-ին, սակայն չեն հայտնել պատճառը:
Ավելի քան կեսդարյա կարիերայով արտիստը նշանավորվել է սերիալներում և այլ հեռուստատեսային «Globo»-ում ունեցած դերերով, ինչպիսիք են Կասանդրա կերպարները «Sai de Baixo»-ում և Dona Armênia «Rainha da Sucata»-ում:
Արասիի մասնակցությամբ Globo TV-ի ամենագլխավոր նախագծերից մեկը 1990 թվականի «Մետաղի ջարդոնների թագուհին» հեռուստանովելն է։
1997 թվականին Արասի Բալաբանյանը ստացել է մրցանակ կնոջ լավագույն դերի համար («Նոր զոհը» հեռուստասերիալ):
Արասի Բալաբանյանը ծնվել է 1940 թվականին Բրազիլիայի Մատու Գրոսու դու Սուլ նահանգի Կամպու Գրանդի քաղաքում։ Ծնողները՝ Ռաֆայել և Էսթեր Բալաբանյանները, Լատինական Ամերիկա էին հասել Արևմտյան Հայաստանի Նոր Հաճն քաղաքից՝ փրկվելով 1915 թվականի Ցեղասպանությունից։ Մինչև հանդիպելն Արասիի ծնողներն այրի էին և Արասին ընտանիքի արդեն ութերորդ երեխան էր ծնողների նախորդ ամուսնություններից։ Ծնողները ցանկացել են նրան Արաքսի անվանել՝ Արաքս գետի պատվին, սակայն որոշել են իրենց նոր հայրենիքին էլ արժանին մատուցել՝ հանելով անունից «ք» տառը։ Հարավային Ամերիկայի հնդկացիների տուպի-գուարինի լեզվով «արասի» նշանակում է «լույսի մայր»։
Ընտանիքը տեղափոխվում է Սան Պաուլո, որտեղ Արասին ոգևորվում է դերասանուհի Մարիա Դելա Կոստայի մասնակցությամբ թատերական ներկայացմամբ։ Արասին ընդունվում է սոցիալական գիտությունների ամբիոնի փիլիսոփայության ֆակուլտետ՝ զուգահեռ սովորելով տեղի Դրամատիկական արվեստի դպրոցում, որը 22 տարեկանում հաջողությամբ ավարտում է՝ հոր կամքին հակառակ երրորդ կուրսում լքելով համալսարանը։
Արասի Բալաբանյանը չի ամուսնացել և երեխաներ չի ունեցել:
