Հանրային ծառայությունները կարգավորող հանձնաժողովի նախագահ Գարեգին Բաղրամյանը ՀՀ ԱԺ տնտեսական ու ֆինանսավարկային եւ բյուջետային հարցերի մշտական հանձնաժողովների համատեղ նիստում, ներկայացնելով կատարողականը, տեղեկացրել է, որ հանձնաժողովի 2022 թվականի բյուջեն կազմել է 995 մլն դրամ, փաստացի ծախսվել է 991 մլն դրամ, ինչը կազմում է 91,4 տոկոս:
Զեկուցողը նշել է, որ հիմնական խնայողությունը պայմանավորված է էներգետիկայի բնագավառում նախորդ տարվա ընթացքում կատարած ներդրումների տեխնիկական աուդիտի իրականացման միջոցառման գծով մրցույթի արդյունքում առաջացած տնտեսված գումարից, որը կազմում է 85 մլն դրամ:
Աշխատանքի վարձատրությանն ուղղված միջոցները կազմել են հանձնաժողովի հաստատված բյուջեի 77 տոկոսը, իսկ 23տոկոսը կազմել են բնականոն ապահովման անհրաժեշտ այլ ծախսերը:
Գարեգին Բաղրամյանը տեղեկացրել է, որ 2022 թվականին հանձնաժողովն ապահովել է 8 մլրդ 356 մլն դրամի չափով պետական տուրքերի հարկային եւ այլ եկամուտների մուտքեր պետական բյուջե, որից 995 մլն դրամը կարգավորման վճարներն են:
Անդրադառնալով արդյունքային ցուցանիշներին՝ հանձնաժողովի նախագահը նշել է, որ «Հայաստանի էլեկտրական ցանցեր» ՓԲԸ-ի մասով կան թիրախային ցուցանիշներ՝ պայմանավորված 2016 թվականից ներդրված խթանիչ սակագնային քաղաքականությամբ: 2022 թվականին հանձնաժողովի կողմից տրամադրվել է էլեկտրաէներգիայի մատակարարման 9, ինչպես նաեւ էլեկտրական էներգիայի մեծածախ առեւտրի 10 լիցենզիա:
Նախորդ տարի լրամշակվել են նաեւ էլեկտրաէներգետիկական մանրածախ շուկայի առեւտրային կանոնները: Արդյունքում ինքնավար էներգիա արտադրողները հնարավորություն են ստացել ձեւավորել ինքնավար խմբեր եւ արտադրված էլեկտրաէներգիան սպառել իրենց տարբեր միացման կետերում:
Գարեգին Բաղրամյանը նաեւ տեղեկացրել է, որ 2022 թվականին ինքնավար էներգաարտադրողների թիվն ավելացել է 3342-ով:
