«ATA» («Հայրերի դաշինք») քաղաքական դաշինքից Թուրքիայի նախագահի նախկին թեկնածու Սինան Օգանն իր կողմնակիցներին կոչ է արել երկրորդ փուլում աջակցել երկրի գործող նախագահ Ռեջեփ Թայիփ Էրդողանին։ Այդ հայտարարությունը նա արել է երկուշաբթի՝ մայիսի 22-ին, տեղական հեռուստաալիքների եթերում։
«Թուրքիայում նախագահական ընտրությունների երկրորդ փուլում ես հայտարարում եմ իմ աջակցությունը Հանրապետական դաշինքի թեկնածու Թայիփ Էրդողանին։ Կոչ եմ անում իմ համախոհներին աջակցել նրան ընտրություններում»,- ասել է նա։
Ավելի վաղ թուրքական Hürriyet թերթը հայտնել էր Օգանի՝ ընտրությունների երկրորդ փուլում Էրդողանին աջակցելու մասին հայտարարելու մտադրության մասին։
Թուրքական որոշ լրատվամիջոցներ նշում են, որ Օգանը հրաժարվել է նախագահի երկրորդ հիմնական թեկնածու Քեմալ Քըլըչդարօղլուի աջակցությունից, քանի որ նա սատարում է ահաբեկչական կազմակերպություններին, որոնք իբր կապված են քրդերի հետ։
Թուրքիայում մայիսի 28-ին տեղի կունենա նախագահական ընտրությունների երկրորդ փուլը։ Առաջին փուլի արդյունքներով Էրդողանը ստացել է 49,51 տոկոս, իսկ նրա մրցակից ընդդիմադիր Քըլըչդարօղլուն՝ 44,88 տոկոս։ Օգանը հավաքել է 5,17%:
