Ուղիղ եթերներից առաջ միշտ հուզվում է, սակայն ձայնագրված հաղորդումներ չի սիրում։ Հեռուստատեսությունը նրա համար մի ամբողջ աշխարհ էր, բայց ռադիոն եկավ ու հարմարավետ տեղավորվեց նրա հոգում: Հեռուստառադիոհաղորդավար Մարինա Գրեգի համար բովանդակությունը ձևից կարևոր է:
14 տարի առաջ նա արեց մի բան, որը հիմա անում են համացանցում. յուրատեսակ կերպարներ ստեղծելով և կապ պահելով հեռուստադիտողի հետ՝ նա կարողացավ հասնել նրան, որ հեռուստադիտողը ոչ թե սպասում էր, թե ինչ տեսահոլովակներ է դիտելու, այլ թե ինչ կերպարով է այս անգամ նա հանդես գալու:
Նրա համար մարդկային հարաբերություններում անգնահատելի է անկեղծությունը, կարևոր են ապրումակցումն ու միմյանց զգալը: Կարծում է, որ կյանքը միշտ արդար է․ ժամանակ է պետք, և ամեն ինչ տեղը կընկնի։ Կարևորը երբեք չուշանալն է:
Ասում է՝ հաջողության հասնելու հիմքում անկեղծությունն է: Խնդիրները լուծելու սեփական բանաձևն ունի։
«Եթե այս պահին դժվար է, կամ ինչ–որ հարց է քեզ անհանգստացնում, մտածիր՝ արդյո՞ք քեզ համար հարցը նույնքան կարևորություն կունենա մեկ տարի հետո, որքան հիմա. Եթե պատասխանն է «ոչ» , ուրեմն հանգիստ պետք է շարժվել առաջ», – ասում է Մարինան։