Կենդանաբանական այգու աշխատանքները նախանշված ծրագրով առաջ են գնում, որտեղ սակայն խոսք չկա այգին տեղափոխելու կամ մասնակի տեղափոխելու մասին։ Այգու խորհուրդը նման հարց չի քննարկել։
Հայաստանում դժվար է գտնել մարդու, որը չի եղել կենդանաբանական այգում։ Այն զուտ ժամանցի վայր համարել դժվար է, քանի որ սերունդներին կապում է հիշողությունների պատմության թելով։ Վերջերս Երևանի փոխքաղաքապետ Տիգրան Ավինյանն ավագանու արտահերթ նիստին հայտնեց, որ Կենդանաբանական այգին տեղափոխելու և կենդանիներին ավելի լավ, ավելի բաց պայմաններում պահելու ծրագիր ունեն:
Կենդանաբանական այգում բնակվում է 146 տեսակ կենդանի՝ շուրջ 720 առանձնյակ։ Այգին զբաղեցնում է 35 հա տարածք, որից օգտագործվում է կամ զբաղեցված է մոտ 40 տոկոսը։
Այսինքն՝ 60 տոկոսն ազատ է և կարող է ծառայել նոր կենդանինիներին։ Կենդանաբանական այգու գիտական գծով փոխտնօրեն, այգու տնօրենի ժ/պ Աշոտ Ասլանյանը մեզ հետ զրույցում ասում է, որ այգին զուտ ժամանցի վայր չէ, այն ավելի շատ գիտակրթական գործառույթ ունի։ Ինչ վերաբերում է կենդանաբանական այգին տեղափոխման ծրագրին, ապա Ասլանյանն ասաց, որ լուրը լսել է լրատվամիջոցներից։