Արտյոմի համար պատերազմի ամենամեծ ցավը մանկության ընկերոջ՝ Սարմենի կորուստն էր։ Սարմեն Այվազյանը հերոսաբար ընկավ հոկտեմբերի 6-ին՝ թշնամու խրամատը մի քանի նռնակ գցելով ու փայլուն իրականացնելով ռազմական գործողությունը։ «Իրենց դիրքից առաջինն ինքն է ասել՝ ես կգնամ։ Նռնակները գցում է, զեկուցում,որ խնդիրը կատարված է, դրանից հետո նրա հետ կապը ընդհատվում է»,-պատմում է Արտյոմը։ Արտյոմ Խաչատրյանը ծնվել է 2001 թվականի մայիսի 19-ին Վայոց ձորի Մալիշկա գյուղում։ Յոթ տարեկանում ընտանիքը տեղափոխվել է Երևան։ Զբաղվել է տարբեր սպորտաձևերով, ունեցել հաջողություններ։ 2019-ին ընդունվել է Խաչատուր Աբովյանի անվան պետական մանկավարժական համալսարանի «Կենսաբանություն» բաժին, նույն թվականին զորակոչվել է բանակ։ Ծառայել է Ասկերանի զորամասում։ Պատերազմի օրերին եղել է հիմնականում Ակնայի դիրքերում։ Պատերազմից հետո շարունակում է ուսումը Մանկավարժական համալսարանում, միաժամանակ, սովորում է «Արեն Մեհրաբյան» բարեգործական հիմնադրամում։ Տեսանյութում օգտագործվել են կադրեր «Երկիր Մեդիա» հեռուստաընկերության «Ձեզ բացակա չենք դնի» շարքից։
1 րոպե կարդալու