Մանկությունից մենք ունենում ենք դրվագներ, հիշում անցած ճանապարհը, հիշում ու պեղում պատմություններ, որոնք շատ հետաքրքիր են, հավաքում ենք դրանք, ձևավորում միտք, որի մեջ այդ պատմությունները տեղավորվում են: Այսպես են կառուցվում Արման Չիլինգարյանի ֆիլմերը:
Նրա ֆիլմերի հիմքում մարդկային պատմություններն են, որտեղ սերը գլխավորն է: «Հաջողության հասնելու համար կարևոր են վարպետները. մասնագիտական հմտությունը նրանցից, տաղանդը՝ մեզնից։ Եթե ուսուցիչդ լավն է, քարը լինելու է տաշած, իսկ տաշած քարը գետնին չի մնում», – ասում է ռեժիսոր, սցենարիստ, պրոդյուսեր Արման Չիլինգարյանը։
Նրան բախտ է վիճակվել ուսանել Վլադիմիր Խոտենկոյի, Պավել Ֆիննի և Վլադիմիր Ֆենչենկոյի մոտ: Կարևոր մարդկանց հետ հանդիպումները, նրանց՝ ճիշտ ժամանակին ասված բանալի բառերը շատ բան են տվել նրան:
«Կարևոր է բավականաչափ ցանկանալ, մնացած ամեն բան կլինի»․ հենց այսպես է նրան ոգևորել Ռուստամ Խամդամովը: Ու այդպես Արմանը հայտվել է կինոյի մոգական աշխարհում: Հրաշքները նրան ուղեկցում են ամբողջ կյանքի ընթացքում: Դրանք նաև օգնել են նրան հաջողության հասնել:
Ռեժիսորի համար կարևոր են միջազգային կինոփառատոները, քանի որ դրանք օգնում են ձեռք բերել ծանոթություններ, միջազգային հարթակներում ներկայացնել հայկականը: Նրա նկարահանած վերջին ֆիլմը՝ «Լույսի կաթիլներ»-ը սոցիալական դրամա է, սիրո պատմություն 90-ականների Հայաստանից: Ֆիլմի հիմքում այն լույսի կաթիլներն են, որոնք մեզ ջերմացրել են այդ դժվար տարիներին: