Արցախյան առաջին պատերազմի մասնակից հայրը Իջևանի տարածաշրջանի Սևքար գյուղից ընտանիքը տեղափոխել էր Բերձոր, որտեղ էլ 2001 թվականի մայիսի 14-ին ծնվեց Նվերը։ Չորս տարեկան էր, երբ ընտանիքը Բերձորից տեղափոխվեց Երևան, ապա՝ կրկին Սևքար։ Զորակոչվել է 2019-ի հուլիսի 19-ին, ծառայել է Արցախի Մարտակերտի շրջանում։
44-օրյա պատերազմի ամենածանր օրը հոկտեմբերի երեքն էր, երբ զոհվեց ընկերը՝ Արթուրը, որի մասին Նվերը խոսում է միայն ներկա ժամանակով։ Ասում է՝ նա ինձ համար դեռ ապրում է։ Հոկտեմբերի 13-ին վիրավորվել է, վնասվել են դաստակն ու մատները։ Վերականգնողական բուժում է ստանում Զինվորի տանը։
Նվերն իր բազմանդամ ընտանիքի հետ ապրում է Սևքարում, զբաղմունք չունի, բայց ունի ցանկություն ընդունվել Ագրարային համալսարան ու լրջորեն զբաղվել գյուղատնտեսությամբ։ Կապլանյանների ընտանիքում յոթ երեխա է ծնվել ու մեծացել, ամուսնանալու դեպքում Նվերը պլանավորում է երեքը, բայց, եթե Աստված տա, չորրորդին էլ դեմ չի լինի։