Սեբաստացի կրթահամալիրի տարածքով անցնելիս աննկատ չեն մնում Գագիկ Մելյանի անվան փոքրիկ այգին, որտեղ տարբեր խաղողի վազեր կան, որոնց մի մասի վրա QR կոդ է պատկերված:
Սմարթֆոնի միջոցով կարելի է նկարել կոդն ու իմանալ, թե ինչ խաղողի վազ է, ծանոթանալ պատմությանը և այլն: Անմիջապես հարևանությամբ դպրոցականները գինի են պատրաստում, բայց ոչ սիրողական մակարդակում, այլ բոլոր չափանիշներին համապատասխան:
Գինի արտադրելու հավաստագիր են ստացել ու հունվարից արդեն հայկական շուկայում կտեսնեք Սեբաստացու գինին՝ կարմիր և սպիտակ:
Սա յուրատեսակ լաբորատորիա է, որտեղ գործնական գիտելիքը հաղթանակ է տանում տեսականի հանդեպ, որովհետև ամեն բան դառնում է շոշափելի: Դպրոցում գործում է նաև ագարակ, որտեղ երեխաները տարբեր կենդանիներ են պահում՝ ձիերից սկսած մինչև սագեր, շներ, անգամ՝ սիրամարգ:
Գիտելիքն այստեղ շոշափում են և հավատացած են, որ ամեն բան տպավորվում է ու դառնում կիրառելի, երբ գործնականում ես փորձում, ձախողում, նորից փորձում մինչև ստացվի:
Մեկ մեկնաբանություն