«Վերականգնողի խոհանոց» խորագրի ներքո զրույցների շարքը ծանոթանցրեց վերականգնողի աշխատանքի բնույթին, գործառույթներին, բարձրաձայնեց մշակութային ժառանգության պահպանման, վերականգնման ու վերականգնողների խնդիրների մասին։
ՀՀ ԿԳՄՍ նախարարության Մշակութային ժառանգության և ժողովրդական արհեստների վարչության պետ Աստղիկ Մարաբյանն ասում է, որ վերջերս շրջանառության մեջ դրված ՀՀ Մշակույթի պահպանության և զարգացման 2023–27 թվականների ռազմավարության ծրագրում կարևոր և առաջնահերթ նպատակներից է մշակութային ժառանգության պահպանումը։
Ողջունում և կարևորում է վերականգնողների կողմից իրենց խնդիրների բարձրաձայնումը, որը նաև հիմք դարձավ վերականգնողների համայնքի ձևավորման համար ու կառուցողական երկխոսություն սկսվեց պետության և վերականգնողների միջև։
«Վերականգնողների սոցիալական հարցերը մշտապես նախարարության և կառավարության ուշադրության կենտրոնում են, ընդհանուր ոլորտը վերանայման ու զարգացման նոր ուղղության կարիք ունի։ Մեզ համար որպես առաջնահերթություն դրված է հենց սոցիալական, աշխատավարձերի կարգավորման խնդիրը, բայց նաև որպես ռազմավարական առաջնահերթություն՝ դրված է հենց վերականգնողների դպրոցի կայացումը», – ասում է Աստղիկ Մարաբյանը։
Որպեսզի հնարավոր լինի ապահովել և ամրապնդել վերականգնողների դիրքերն ու զարգացման քայլեր ապահովել, կարևոր է ստեղծել ինստիտուցիոնալ հիմքեր։
«Մենք հարցի լուծումը դիտարկում ենք երկու տեսանկյունից՝ կարճաժամկետ և երկարաժամկետ։ Երկարաժամկետը վերականգնողների դպրոցի կայացումն է, իսկ կարճաժամկետ առումով դիտարկում ենք ատեստավորման և լիցենզավորման կարգի ներդրումը»։
Աստղիկ Մարաբյանը կարևորում է նաև փորձի փոխանակման ու կրթական ծրագրեի հնարավորությունները, ժառանգության պահպանման գործում հանրության ակտիվ ներգրավվածությանն ուղղված ծրագրերը․ «Հանրային և համընդհանուր պատասխանատվությունը շատ կարևոր է․ պահպանության համար ներգրավել հասարակության տարբեր խմբերի՝ ժառանգության պահպանությունը ներառելով կրթական գործընթացներում։ Սա միայն կառավարության ու իշխանության հարց չէ, բոլորս պատասխանատու ենք մեր ժառանգության պահպանության համար»։