Ալեքս և Անիի հիմնադիր Քերոլին Ռաֆայելյանի ոսկերչական նոր ապրանքանիշը՝ Metal Alchemist-ը, հինգշաբթի հայտարարել է, որ համագործակցում է Շերի հետ՝ օգնելու միջոցներ հայթայթել աշխարհի ամենահին՝ Էջմիածնի տաճարի վերականգնման համար, հայտնում է Boston Globe-ը։
Կալիֆոռնիայում բնակվող բժիշկ, կինոպրոդյուսեր և ձեռնարկատեր Էրիկ Էսրաիլյանը Ռոդ Այլենդում գտնվող ընկերության առաջին բարեգործական նախաձեռնության երրորդ գործընկերն է: Զարդերի շարքը, որը ստացել է «Ալքիմիա Հայաստանի համար» անվանումը, բաղկացած է մետաղալարե ապարանջաններից, որոնց վրա փորագրված են Տերունական աղոթքի առաջին բառերը՝ «Հայր մեր»:
Ռաֆայելյանի խոսքով` մետաղե ապարանջանների վաճառքից ստացված ողջ հասույթը կուղղվի Հայ առաքելական եկեղեցուն` Էջմիածնի և Խոր Վիրապ վանական-եկեղեցական համալիրների վերականգնման և պահպանման համար: Կախված մետաղից, ապարանջանների արժեքը տատանվում է 28-ից 128 դոլարի միջև:
Boston Globe-ին ուղարկված հայտարարության մեջ Շերը նշել է, որ Էջմիածնի Մայր տաճարի և Խոր Վիրապի պահպանումն ու վերականգնումը կպահպանի նաև Հայաստանի «հարուստ հավատքը, պատմությունը և մշակույթը»:
«Կարևոր է, որ ապագա սերունդները կարողանան այցելել և գնահատել այս պատմական եկեղեցին»,- ասել է Շերը: «Իմ հայկական արմատները իմ կամքի մեծ մասն են, և ես ոգևորված եմ նման արժեքավոր գործի մի մասնիկը լինելու համար»:
Գործարար Քիմ Քարդաշյանը, ով նույնպես հայկական արմատներ ունի, հինգշաբթի իր Instagram-ում գրառում է կատարել Metal Alchemist-ի նոր շարքի մասին։
«Ես միշտ ուղիներ եմ փնտրում՝ աջակցելու Հայաստանին և աշխարհի ամենասուրբ, հնագույն վայրերին»,- ասել է Քարդաշյանը Instagram-ի իր սթորիում տեսագրված տեսանյութում։
«Աշխարհի ամենահին տաճարը Հայաստանում է, և այնտեղ մկրտել եմ երեխաներիս։ Այն վերականգնման խիստ կարիք ունի, ուստի այս ապրանքանիշի Metal Alchemist-ը պատրաստում է այս ապարանջանները, որոնց շահույթի 100 տոկոսը ուղղվում է տաճարի վերականգնմանը»:
Քարդաշյանն ասել է, որ Metal Alchemist-ն իրեն մի քանի զարդ է ուղարկել։ «Ես այնքան հպարտ եմ դրանցով»,- ասել է Քարդաշյանը։
Էջմիածնի Մայր տաճարը, որը թվագրվում է 303 թվականին, կառուցվել է Արարատ լեռան մոտ և համարվում է քրիստոնեության ծննդավայրը Հայաստանում։ 2001 թվականին տաճարը ճանաչվել է ՅՈՒՆԵՍԿՕ-ի համաշխարհային ժառանգության մաս և երկրի ամենաշատ այցելվող վայրերից մեկն է:
«Իմ հավատքը հատկապես կարևոր է ինձ համար, և հայերը դարեր շարունակ ապավինել են Հայ առաքելական եկեղեցուն»,- ասվում է Էսրաիլյանի հայտարարության մեջ: «Համայնքին աջակցելը միշտ առաջնահերթություն է եղել ինձ համար, և ես շատ երախտապարտ եմ` միանալու իմ սիրելի ընկերներ Քերոլինին և Շերին այս սուրբ վայրերը պաշտպանելու ջանքերում»:
