Հայաստանի վարչապետ Նիկոլ Փաշինյանը չի բացառում Պրահայում Թուրքիայի նախագահ Ռեջեփ Թայիփ Էրդողանի հետ հանդիպումը։
«Երկու կողմերն էլ չեն բացառել նման հանդիպում։ Հանդիպում չբացառելը չի նշանակում, որ հանդիպումը կկայանա, բայց դեռ չի նշանակում, որ այն չի կայանա։ Դա կախված է մի քանի գործոններից՝ ոչ միայն մեր հարաբերություններից»,- ասել է վարչապետը։
«Ես որոշել եմ մասնակցել Պրահայի գագաթնաժողովին, բայց չեմ կարող հաստատել՝ հանդիպումը կկայանա, թե ոչ»,- հավելել է Փաշինյանը։
Երկու երկրներն էլ հրավիրվել են հոկտեմբերին մասնակցելու Պրահայում կայանալիք Եվրոպական քաղաքական համայնքի առաջին հանդիպմանը:
Թուրքիայի նախագահն ավելի վաղ ասել էր, որ Պրահայում Հայաստանի վարչապետ Նիկոլ Փաշինյանի հետ հանդիպման հնարավորություն կարող է լինել։
«Ես դիտարկում եմ Պրահայում Եվրոպական քաղաքական համայնքի հանդիպմանը մասնակցելու հարցը, և եթե որոշում կայացվի մեկնել Չեխիա, ապա ենթադրաբար այնտեղ կլինի նաև Հայաստանի վարչապետ Նիկոլ Փաշինյանը, և կարող է հանդիպում կայանալ։ Հնարավոր է, որ մենք հնարավորություն ունենանք այնտեղ քննարկել բոլոր հարցերը»- ասել էր Էրդողանը։
