«Ուկրաինան դե ֆակտո պայքարը շարունակելու է ՌԴ տարածքում». քաղտեխնոլոգ
Ուկրաինայի ռուսական վերահսկողության տակ գտնվող շրջաններում` Խերսոնի և Զապորոժիեի մարզերում, ինչպես նաև ԴԺՀ-ի և ԼԺՀ-ի տարածքներում Ռուսաստանի հետ միավորման հանրաքվեները Կիևը չի ճանաչում, հետևաբար ռազմական գործողությունները չեն դադարելու, ռմբակոծությունները շարունակվելու են` կարծում է քաղաքական տեխնոլոգ Արմեն Բադալյանը։
Ըստ «Ռադիոլուր»-ի զրուցակցի` նշված տարածքները Մոսկվայի կողմից Ռուսաստանի անբաժանելի մաս հայտարարվելուց հետո «ռազմական հատուկ գործողություն»-ը կվերանվանվի «հակաահաբեկչական գործողության» և սրանով որոշակի բեկում կմտցվի ռուս-ուկրաինական պատերազմում։ «Իրադարձությունների նման զարգացման դեպքում, ինչը անխուսափելի է, Ուկրաինան արդեն «դե ֆակտո» պայքարը շարունակելու է ՌԴ տարածքում։ Ստեղծված իրավիճակը ռուսական կողմը դիտարկում է որպես նոր հնարավորություն։ Հակամարտության նոր շրջափուլում կողմերը փորձելու են վերադարձնել կորցրած տարածքները»,-ասում է քաղտեխնոլոգը։
«Ուկրաինան այժմ փորձելու է վերականգնել մինչև փետրվար քսանչորսյան իրականությունը, իսկ Ռուսաստանը, բացառությամբ արևմտյան Ուկրաինայի, փորձելու է ուկրաինական մյուս տարածքները միավորել դաշնության կազմում՝ սրանով վերացնելով, ինչպես Մոսկվան է որակում, Արևմուտքի կողմից ստեղծված անկախ հակառուսական քաղաքական միավոր Ուկրաինան»։
Երբ և որտեղ է հատվելու ռուս-ուկրաինական հակամարտության կարմիր գծերը, ներկա իրողությունները կողմերին մոտեցնո՞ւմ, թե՞ հեռացնում են բանակցային հնարավոր գործընթացից։