Կամո Գևորգյանը ծնվել է Գեղարքունիքի մարզի Վարդենիսի Ծովակ գյուղում, բայց սովորել ու մեծացել է Կոտայքի մարզի Նոր Հաճն քաղաքում։ Զորակոչվել է 2019-ի հուլիսի 2-ին, ծառայել է Արցախի Հանրապետության Իվանյանի տանկային զորամասում որպես 2S1-ի նշանառու օպերատոր։ Մեկ տարի անց զորամասի հրամանատարական կազմի որոշմամբ գործուղվում է Մարտունի 3-րդ պաշտպանական շրջան ու վերադառնում որպես 2S1-ի հրամանատար։ Պատերազմի ժամանակ եղել է Իվանյանում, ապա՝ Ջրականում, որտեղ էլ հոկտեմբերի 10-ին ԱԹՍ-ի հարվածից վիրավորվել է։ Կամոյի աջ ոտքը կոտրվել էր չորս տեղից, , ձախն ամբողջությամբ բեկորներով էր պատված։ Պայթյունի ալիքից վնասվել էին աղիները, թոքերը, ականջների թաղանթները։ Ինը վիրահատություն է տարել, բայց դա վերջը չէ։ Երբ մտերիմներն ասում են՝ լավ կլինի, Կամոն անպայման հակադարձում է՝ ուրիշ տարբերակ չկա, պիտի լավ լինի։
Սովորում է Ճարտարապետության և շինարարության ազգային համալսարանի Դիզայնի ֆակուլտետում, զբաղվում է արծաթագործությամբ ու 3D մոդելավորմամբ։