Մինչ զորակոչվելը Ռաֆո Զաքևոսյանը ընդունվել էր Հայաստանի ազգային ագրարային համալսարան, որտեղ էլ զորացրվելուց հետո շարունակում է ուսումը։ Զորակոչվել է 2019-ի դեկտեմբերի 24-ին, ծառայել է Քաշաթաղի շրջանում։ Պատերազմի օրերին եղել է Ջրականում, ապա՝ Խնձորեսկում։ Ծառայությունն ավարտել է Գորիսի զորամասում։ Թեթև բեկորային վիրավորման մասին անգամ չի ցանկանում խոսել, ասում է՝ իսկ ի՞նչ ասեն մյուսները․․․
Պատերազմի ծանր օրերից մեզ է փոխանցում մի քանի դրվագ, որտեղ հրաշքով է փրկվել մահից։ Հիշում է, օրինակ, երեք անիվով սլացող մեքենան, որի մեջ գոռալով աղոթում էին։ «Մեր աղոթքը չդադարեց, մինչև ապահով տեղ հասանք»,-պատմում է Ռաֆո Զաքևոսյանը։
Մասնագիտական գիտելիքներն այսօր նա հաջողությամբ կիրառում է ընտանեկան բիզնեսում։ Ֆերմա ունեն, բազմաթիվ կենդանիներ, զբաղվում է շների, ձիերի վարժեցմամբ։ Բնությունն ու կենդանիներին մանկուց է սիրել, նրանց հետ գտել իր հանգիստը։ Ծնվել է 2001 թվականի հուլիսի 22-ին Արարատի մարզի Դաշտավան գյուղում, ընտանիքի չորս զավակներից ավագն է։
