Այսօր ունենք զարգացած և զարգացող գրահրատարակչական ոլորտ՝ ասում է ԿԳՄՍ նախարարության գրականության ոլորտի գլխավոր մասնագետ, խմբագիր Արմեն Սարգսյանը։ Նախկինում ժամանակակից հայ գրողը երազում էր, որ շնորհանդեսի ընթացքում գրքեր վաճառվեն։
Այսօր ժամանակակից հեղինակների գրքերը ոչ միայն վաճառվում են, այլ նաև լավ են վաճառվում։ Արմեն Սարգսյանն ասում է, որ գրահրատարակչական ոլորտում Նախարարության քաղաքականությունը հրատարակչական փուլից անցում է կատարել դեպի ստեղծագործողների խթանման փուլ։
Ստեղծագործողն այսօր ստեղծագործական գործունեության համար կարող է դիմել նախարարություն, ստանալ մինչև 1միլիոն դրամ դրամաշնորհ։ Կան հրաշալի ստեղծագործություններ, որոնք ծնվել են այդ դրամաշնորհի արդյունքում։ Խոսելով ոլորտի խնդիրների մասին՝ Արմեն Սարգսյանն անդրադառնում է չթարգմանված հայ գրականության բացերին։
«Մեր գրականությունը թարգմանվելու կարիք ունի։ Դրսում հրատարակվելու հնարավորությունը շուրջ 100 տարի մենք բաց ենք թողել»։ Ասում է՝ գրեթե նոր ենք սկսել թարգմանել հայ գրականությունը և արդյունքները գոհացուցիչ են։ «Վերջին 4 տարում արտերկրում հրատարակվել է շուրջ 50 գիրք 20 լեզվով», – նշում է Սարգսյանը։
Հետո հավելում է, որ գրքերն ընտրում են արտասահմանյան հրատարակչությունները, վատ գրքի համար նրանք չեն դիմի նախարարությանը։ Հայաստանի ԿԳՄՍ նախարարության և Չինաստանի գրահրատարակչական կենտրոնի միջև կնքվել է հուշագիր, ըստ որի առաջիկա 5 տարիների ընթացքում փոխադարձ թարգմանություններ են արվելու, երկու երկրներում կտպագրվի 25 հայ և նույնքան չինացի հեղինակի ստեղծագործություն։ Խոսելով որպես խմբագիր իր գործունեությունից՝ Արմեն Սարգսյանն ասում է, որ շուտով լույս է տեսնելու ամերիկաբնակ գրող Սարգիս Վահագնի՝ Արշիլ Գորկու մասին կենսագրավեպը։
